E detencion siman pasa di un empleado di restaurant na aeropuerto ta hayando un rabo largo. Parce cu mas di un detencion, cu aki ta trata di un red di droga, operando entre varios empleado na aeropuerto, cu ta percura pa droga sali di Aruba pa Merca y Canada. Ta resulta cu a haya mas droga despues y posiblemente lo cay mas detencion pronto.
E descubrimento di tasnan cu droga pa siguridad, a causa un desmantelacion di un red di droga den aeropuerto. E miembronan di siguridad trahando na aeropuerto a cay riba e tasnan di droga cu tabata pasa nan dilanti den pantaya!
E hoben yama “Kleine” di inicialnan A.R. ta deteni. El a pasa un tas carga y djey a bay pa un di dos cu e lo a lubida. Eynan siguridad a mira cosnan straño y a para pa control. A resulta cu e tabatin tur e pakinan cu cocaina hinca den e rugtas. Total den dos tas tabata tin 22 paki.
Den un area di e restaurant unda “Kleine” ta traha a descubri mas tas yena cu droga. Ora a bay den su auto pafo a descubri otro tasnan tambe yena cu pakinan di cocaina. E sospecho ta cu e trahado femenino di siguridad di Aruba Airport Authority por ta envolvi. A mand’e cas caba pero no sa si a detene caba pa su envolvimento.
Cu e descubrimento aki a desmantela un red grandi di droga cu tabata sali for di Aruba cu tasnan yena cu droga. Pasaheronan tabata djis pasa bay y prome cu subi avion tabata tuma e tas yen di droga y sigui nan caminda sin problema pa Canada of un destinacion na Merca. Ta sospecha cu e cos aki tabata pasando pa basta tempo caba y awor si a pone un fin na e red criminal aki.
Awor pa tipo di asuntonan asina, pa tiki placa “extra”, bo ta perde bo libertad y un bon trabou!
