Por lo menos un cas di cuido mas, esta Zorg met liefde Tehuis tambe a haya keho riba e forma di traha di e cas Años Dorados situa na Dakota. Un ex-trahado a solicita y a menciona e mesun tipo di retonan. Riba dje ayera a yega famia di cliente nobo cu tambe ta pidi pa tuma nan ser keri mesora debi na mal trato. E ta un tema cu Inspectie Volksgezondheid Aruba lo mester controla urgente, pasobra ta parce manera “ken cu ta” por habri un cas y acepta cliente, cobrando pa cuidanan sin cu nan tin e preparacion ni e forma con pa cumpli cu e trabou.
Lynette Browne ta maneha Zorg met liefde Tehuis situa na Savaneta 227-F pa 3 aña caba. El a traha hopi aña como nurse na Hospital na Aruba y despues a bay biba na Hulanda, unda el a sigui den e mesun ramo. Awor cu el a bin Aruba, el a opta pa habri un cas di cuido, pa e por sigui brinda e mesun calidad di cuido cu el a haci semper den su bida na su pashentnan. Awor e ta haci’e pa clientenan. Eyden nan tin espacio pa 15 cliente pero tin 12 awor cu ta bibando felizmente den e cas. Ey nan ta cushina pa nan, ta brinda nan cuido, ta entretene nan y percura pa nan por biba un bida digno.
Leynan nobo pa casnan di cuido a drenta na vigor algun tempo pasa y desde 1 di augustus proximo lo wordo reenforsa. Pa esey nan mester a haci bastante inversion den nan cas, manera ta crea facilidad pa rolstoel por subi y baha stupi, percura pa portanan mas hancho, luznan di EXIT, portanan mas hancho, kita instalacion di gas for di e cas y pone pafo den cura, instala alarma di candela y asina por sigui menciona. Lynette Browne a conta cu el a haci tur e cambionan aki cu placer, pasobra aunke e ta costa hopi placa, toch e ta na bentaha di e clientenan y di nan mes cu ta pasa henter dia eyden.
Su casa, Fernando Browne, ta conseha yiunan cu kier hinca nan ser keri den un cas di cuido, pa no papia cu e doño, pasobra e lo haci tur lo posibel pa bendebo su cas. Bo mester papia cu e clientenan, puntra nan con ta trata nan eyden, si ta dal e clientenan, si ta duna nan di come na ora, si e calidad di cuminda ta bon, si ta bañanan na tempo y asina por sigui menciona.
Awor aki ta scuchando storianan cu de facto ta “vies”, di con otro casnan ta atende cu nan clientenan. Por ehempel di 6 cliente ta comparti e mesun serbete, of dos hende drumiendo riba e mesun cama y asina por sigui menciona. Reglanan di higiena ta na suela den otro casnan, cu kisas ta un poco mas barata berdad, pero e nivel di calidad tambe ta bou di e normanan acepta y hasta aproba den un ley cu a pasa Parlamento di Aruba.
