Awe marduga alrededor di 12:15 am a sosode un caso di atraco brutal na Ponton. Dos homber cara tapa a changa un homber den su van di trabou. E antisocialnan a atrac’e patras di su cas mes na Ponton.
E dos atracadonan a kibra un band’i glas y saca e homber fo’i su auto. A golpie y pidi pa placa. Na e sitio nos a compronde cu a logra bay cu su cartera. No ta conoci cuanto placa a bay cu ne. Ta trata aki di un empleado di supermarket den bicindario, situa net na e subida di e caminda di Ponton. E empleado ta biba na cas di e doño mes, pues ta un persona yega na e famia cu ta maneha e supermercado.
E victima a conta cu ambos atracado ta papia bon Papiamento y nan a huy bay den un auto chikito color blanco. E atraco a sosode asina lihe cu e victima no a mira si nan tabata arma of no. Cu un band’i wowo baha tampoco a yuda e causa. E homber tabatin sanger na su cara y e no sa cu kico nan a dal’e den su cara cu a tapa un wowo y herid’e na cabes.
Paramediconan a presenta pa brinda asistencia medico na e victima, kende a cana riba su mesun forsa pa subi ambulance. A manda yama Slachtofferhulp pa yuda e victima y su famia, a pidi pa e ekipo forensico di polis pa conduci investigacion na e sitio buscando pruebanan y sin lubida recherchenan di Atraco Team pa investiga con e atraco aki a sosode y pa purba yega na e atracadonan.
