Recientemente Marilynn Hermans a presenta su tesis titula ‘The Court of Audit of Aruba and its commitment to Integrity -An example of Integrity Management’ na Voorzitter di College di Algemene Rekenkamer, drs. Xiomara Croes-Williams.
Marilynn tabata studiante di Organisation, Government and Management (OGM) di Universidad di Aruba y den cuadro pa finalisa su studio, a prepara su tesis cu ta basa riba con Algemene Rekenkamer ta promove y proteha integridad den su institucion. Den e investigacion aki a scoge Algemene Rekenkamer como e punto di salida, door cu Algemene Rekenkamer ya a introduci un “Plan di maneho di Integridad y Codigo di Conducta”. E pregunta di e investigacion ta, con Algemene Rekenkamer ta proteha y promove e maneho di Integridad den su organisacion. Otro punto cardinal den e tesis ta pa evalua si e institucion di Algemene Rekenkamer por fungi como un ehempel den e maneho di integridad y etica pa henter e sector gubernamental.
Pa e motibo aki a tuma contacto cu stakeholders interno y tambe externo. Un resultado hopi importante ta e impacto di lead by example, door di un incidente cu a tuma luga. Pa e motibo ey a aplica e Plan di Maneho di Integridad y e Codigo di Conducta stipula den practica tambe. Un resultado cu a resalta ta cu mayoria di e stakeholders externo, ta na altura di existencia di e Plan di Maneho di Integridad como tambe e Codigo di Conducta, pero solamente un persona a lesa e documentonan aki completo.
Algemene Rekenkamer tin su Plan di Maneho riba Integridad, Integriteitsbeleid, como tambe su Codigo di Conducta, Gedragscode, vigente desde aña 2020 pa tanto su miembronan di College como tambe pa su personal. Algemene Rekenkamer ta gradici Marilynn pa su tesis y alabes ta dese’e hopi exito cu su futuro estudio na Hulanda.
