Awe a detene di dos sospechoso den caso Apollo. Ta sospecha e persona aki tambe di envolvimento den asesinato di Poentje Castro. “Investigacion ta continua. Mas detencion no ta wordo exclui”, di acuerdo cu Ann Angela, vocero di Ministerio Publico di Aruba. Mientrastanto awe fiscal lo mester dicidi si ta prolonga e detencion di e prome sospechoso of si ta lag’e liber. Tabata wardando riba declaracion di e prome sospechoso, pa por a deten’e e di dos. Ta bou di e impresion cu sea nan sa mas of cu nan mes ta envolvi den e asesinato, aunke cu ta specula cu lo por tin un persona mas, cu a duna e ordo pa e asesinato!
Dia 20 di april ultimo Ministerio Publico a anuncia cu nan a habri e caso di Poentje Castro di nobo. Un team di Cuerpo Policial di Aruba, riba peticion di Ministerio Publico, a haci un revision (review) di e investigacion aki cu ta carga e nomber di “Apollo”. E revision a hiba na puntonan di referencia concreto pa mas investigacion, a base di cual a keda dicidi pa start e investigacion di nobo.
A traha cu dedicacion na scucha testigonan activamente cu por aporta na soluciona e caso. Ademas Cuerpo Policial di Aruba y Ministerio Publico ta convenci cu tin hende cu tin conocimento di e caso, pero cu te ainda no a papia nada. Recherchenan parce a papia cu varios persona di interes den e caso aki, cu a confirma cierto sospecho cu tabata existi desde algun aña caba.
Ta bon pa splica cu e casonan aki nunca ta caduca, sino ta sigui habri te na momento cu caba di haya e culpabel. Den pasado nunca a detene un sospechoso y a laga pasa comosifuera esaki tabata un crimen perfecto. Awo despues di 11 aña ta asina leu cu a opta pa bay tras di un sospechoso cu ta sinti cu e sa hopi mas di e caso y posiblemente e mes a asesina Poentje Castro.
E CASO DI ASESINATO
John Anthony Castro ta naci dia 20 di october 1963 y tabata produci y presenta e programa “Un dia den bida” cu tabata pasa na Tele Aruba. Bisiñanan a conta cu entre 10or y 11or di anochi di diaranson dia 22 di december 2010, nan a scucha zonido di tiro, cu a zona manera klapchi. A tende zonido di un motorcycle pasando duro den bario.
Diahuebs mainta trempan, dia 23 di december 2010, a bin topa cu Poentje Castro benta na suela den su cura di cas, den un plas di sanger. A hay’e lomba sunu, bisti cu jeans y cu slof na pia. Investigacion a indica cu el a haya un tiro di cerca, den su frenta. Poentje tabatin 47 aña dia cu a mat’e. Despues di e dia ey, a scucha di varios nomber cu lo por ta sospechoso den e caso di asesinato aki.
