Camara di Comercio tin 9 miembro den su Hunta di Supervision, di cual 3 miembro ta nobo. Den e 6 miembronan cu ta keda, lo mester nombra un Presidente nobo. Nombernan cu ta mencionando ta di Omar Tromp, Wanda Broeksema y Satish Daryanani. Tanto Tromp como Daryanani a yega di sirbi caba como Presidente di e organisacion.
Mirando e retonan cu tin actualmente den e economia di Aruba, mesora tur wowo ta riba e directiva di Camara di Comercio, pa ta para eynan como guia pa comerciantenan y na mes momento como “watch dog” pa defende crecemenro y desaroyo di comercio di nos pais. Den nan trabounan diario, Camara di Comercio ta conseha Gobierno riba nan maneha economico, pero no tur ora Gobiernonan ta sigui e consehonan aki.
Kawish Misier a sirbi den e funcion di Presidente e ultimo aña aki y no ta reeligibel pa otro aña. Bou su liderazgo a realisa varios proyecto pa cu e website di e organisacion, cambionan interno y eventonan pa engrandece e netwerk di comerciantenan.
Entre e posibel candidatonan ta figura Omar Tromp, un fisioterapista banda di Director di Felipe Construction cu ta encarga cu varios trabou grandi di construccion na WEB y na Aeropuerto. Satish Daryanani ta bin for di e compania Palais Hindu, cu awendia ta mas activo den real estate. Wanda Broeksema awendia ta gerente di Starbucks na Aruba y Corsou. E ta bin di un posicion ehecutivo na NV Elmar y ultimo como Director di Digicel Aruba.
Por nota cu pocopoco nos hobennan local mes ta cuminsa aspira posicion di liderazgo den nos economia, den cual por spera cu lo por rehubenece nos comercio, e desaroyonan tecnologico cu ta afecta comercio, plataformanan online y mas.
E reunion di Camara di Comercio ta tuma luga diaranson pa 12:00pm den edificio di KVK mes riba JE Irausquin Boulevard. Keda pendiente pasobra 24ora.com lo ta presente pa cubri e cambio di mando den e organisacion comercial mas importante di nos pais.
