Manera ya ta conoci, e portanan di 24ora.com semper ta habri pa un y tur cu tin cualkier malcontento, keho of comentario cu nan kier pa pueblo henter ta na altura di dje. E biaha aki ta Indira Varis a acerca nos pa asina e trece un preocupacion pa dilanti. Indira Varis no ta un persona desconoci y ultimamente e tabata basta den noticia pa diferente motibo. Un di e motibonan ta cu recientemente, cu urgencia nan a mand’e Colombia den cuadro cu un embaraso complica.
Segun Varis a splica no tin ningun dokter na Aruba apto pa trata e complicacion aki. Asina AZV a mand’e Bogota y a inform’e cu nan lo bay percura pa cubri tur gasto encuanto su hospitalisacion y tratamento y cu tambe e lo haya un suma diario pa cubri su cuminda. Sinembargo, desde dia 17 di october cu el a sali for di hospital, Varis a bisa cu e no haya ni un florin for di e oficina internacional ya cu segun nan a bis’e, e no tin derecho riba esaki.
Acerca di esaki tin tambe cu su yiu lo mester sali for di hospital y bay cerca dje na hotel pero e dokter na Colombia a splica cu AZV mester cubri oxigeno p’e ya cu debi na e haltura dje ciudad, e baby no por hala rosea 100% bon. Tambe e dokter a informa cu AZV mester manda busc’e for di Colombia cu un Air Ambulance pa asina transport’e pa Aruba debi na e mesun problema di halamento di rosea y riba un vuelo convencional e no lo por bay cu oxigeno.
Pa sorpresa di Varis, for di 7:30 am ayera ora cu e oficina internacional ta habri aya na Bogota, a manda un e-mail pa AZV informando tocante esaki, no a ricibi ningun contesta. Si a contesta Varis ora cu el a bay reclama esaki via mensahe di texto y a bis’e cu su caso ta den man di ‘juridische zaken’. Awo Varis ta puntra su mes ta kico ‘juridische zaken’ tin di haber cu AZV a mand’e afo? Tambe ta puntra su mes con por ta posibel cu nan ta “prefera di perhudica un mucha inocente contal cu bo no djis manda un e-mail bisa si su zuurstof ta aproba”.
“Bo a saca mi fo’i mi luga paso abo no tin hende adecua pa traha, bo ta saca mi fo’i mi luga, bo no ta zorg pa mi por haya cuminda, bo ta saca mi fo’i mi luga aworaki nan ta bisa cu ora cu mi yiu sali ami mes tin cu bay zorg pa tur cos p’e”. Den tur esaki, Varis ta puntra su mes pakico AZV no ta djis firma pa tanto e y su yiu recien naci por regresa cas. Segun a inform’e, e persona encarga cu su caso lo ta na cas y no tin ningun otro hende cu por trata e caso aki. Asina Varis a bin ta bisa cu “Salud no ta depende di ki dia abo kier traha of laga di traha” y ta spera cu aproba e oxigeno pa su yiu of a bira momento pa e minister concerni bin atende cu esaki paso no por ta posibel cu personal ta bay cu vakantie y no tin hende pa aproba locual ta pendiente.
