Lino Hernandez ta consehero huridico di Pensionadonan Uni y durante di un rueda di prensa yama diahuebs na Don Bosco, el a splica en corto, con e asunto di gelijkbedrag y bashipremie a bay.
Dia 24 di November 2014, gobierno di e tempo ey a tuma un decision cual ta yama uno unilateral pa stop di pago di gelijkbedrag y bashipremie na e empleadonan publico cu a baha cu pensioen entrante 1 di Januari 2015.
Pakico ta yam’e unilateral. Lino Hernandez a splica cu den ley ta para cu den articulo 101 di LMA, manera cu tur ambtenaar conoce, ta bisa cu ora cu tin algo di haci cu e posicion huridico di e empleadonan publico, mester bay den un comision central di GOA, pa haya discuti cu e sindicatonan pa e cambio cu gobierno tin pensa di bin cun’e.
Durante e conferencia di prensa, Hernandez a bin cu un carta di dia 30 di Maart 2005, di ex prome minister di e tempo ey, caminda cu e ta mand’e pa e presidente di comision central, unda cu e ta menciona e articulo di 101 di LMA.
E carta ta bisa cu gobierno tin di bay drecha e posicion huridico di e ambtenaarnan entrante 2005. E ta bisa den su carta cu e introduccion di un voorjaarspremie na 500, un aumento di vakantieuitkering y e gelijkbedrag ta subi di 896 florin pa 1250 florin.
Asina e procedura ta ora cu kier cambia e posicion huridico di e ambtenaarnan. Tin cu bay via ley pa bo haya cambi’e, pasobra e ta poni den e ley di LMA.
Kico ta pasa?
El a sosode unilateral y el a causa cu awe tin e grupo aki cu no ta cobra nan gelijkbedrag.
Aña pasa cinco sindicato a sinta cu e tempo ey e minister di finansas, Angel Bermudez y minister di asuntonan economico, Richard Arends, tocante gelijkbedrag y bashipremie. Pero lamentablemente Hernandez a menciona cu tur respet pa tur dos persona, ningun di dos no ta compronde e materia.
Por tin comprension pa e ministernan cu nan no ta compronde e materia y nan a bin cu conseheronan cu tampoco no ta compronde e materia y ta bruha tur cos den otro.
Ta sali mas bruha for di e reunion, cu a drenta. Nan ta hink’e den pensioen y e ta bruha, pasobra cu e asunto di gelijkbedrag cu bashipremie, e tin ta haci cu indexering. Tin indexering, tin inhaalmanouvre. For di esey a sali e gelijkbedrag y bashipremie.
Gelijkbedrag y bashipremie a sali como cu gobierno no por indexeer e salario di e empleadonan publico mas, anto e ora nan a dicidi bay paga esaki p’afo di salario.
Pero e ta cay di indexering, pasobra e indexering ta un debe cu gobierno tabata tin di aña 1983 te cu 1996, cu e empleadonan publico.
Nan ta bruha esey tambe den otro. A reuni dos pa tres biaha cu ex minister Bermudez, pero no a logra saca nada for di nan.
Despues di reuni cu minister di asuntonan economico y finansas actual, dia 27 di Juli di e aña aki y a purba di splik’e.
Kico ta sosode
E conseheronan di minister ta cuminsa bisa e minister cu e pago di e gelijkbedrag y bashipremie no tin un wettelijke grondslag, esta no ta basa riba un ley. E ora, na momento cu e minister di finansas a trece esey dilanti, Hernandez a bira y puntra e minister, riba cua wettelijke grondslag gobierno ta paga e pensionadonan prome cu 1 di januari 2015. Eynan tampoco no tin un wettelijke grondslag, pero gobierno ta page toch.
Pakico gobierno ta page?
Di 1996 bin ariba, tur biaha, a base di protocol, e ta wordo paga. Den tur protocol e ta wordo poni cu e pensionadonan tambe ta wordo paga gelijkbedrag y bashipremie. Hernandez no ta mira con nan por laga un minister bisa cu e no tin un wettelijke grondslag. Ta den e protocolnan e ta wordo regla. Y manera cu e prome minister a bisa dene reunion tambe, e tambe ta haya husto cu mester paga e pensionadonan nan gelijkbedrag y bashipremie.
