Pensionadonan Uni, un total di 47 ex ambtenaar registra, a tene un conferencia di prensa pa trece varios punto p’adilanti. A kita bashi premie y gelijkbedrag di tur cu a baha cu pensioen riba of despues di 1 di januari 2015. Sinembargo, esunnan cu a baha cu pensioen prome si ta cobre normal.
Tur cu ta trahando ainda den Gobierno, sea ta ambtenaar of arbeidscontractant, ta sigui ricibi nan bashipremie y gelijkbedrag.
E pensionadonan aki ta rabia, disgusta y decidido y ta urgiendo e gobierno actual, MEP/POR/RED pa drecha y coregi e situacion inhusto, desigual y descriminatorio aki.
Bashipremie y gelijkbedrag
Na aña 1983, gobierno a vries indexering di empleadonan publico.
Kico ta indexering?
Indexering ta adaptacion di salario na e inflacion, pa asina e salario keda igual na e forsa di compra. For di April 1983, te Augustus 1994, e empleadonan publico a entrega 47% na indexering. Casi 50% di perdida di forsa di compra.
Durante e deliberacionnan na 1996, empleadonan publico a entrega 25% di e 47%. Es decir, gobierno no tin nodo di paga nan mas. A resta ainda 22% y esey nan a cumbini den un protocol di 27 di November 1996. Ta un protocol firma entre gobierno y sindicatonan, cu ta representa e empleadonan publico, cu nan ta bay paga e 22% cu e gobierno debe e empleadonan publico. Nan ta bay haci’e den un forma di inhaal manouvre.
For di e inhaal manouvre aki, e bashipremie y gelijkbedrag a inicia. Na 1996, gobierno y sindicatonan a cumbini pa paga e debe di gobierno na empleadonan publico, esta e 22% den cinco aña.
1996, 3%. 1997, 5%, 1998, 5%, 1999 5% y 2000 4%.
Si conta e porcentahenan aki, e ta yega 22%.
Tambe ta poni cu palabranan cla y no pa otro interpretacion, cu tanto na e pensionado y personanan cu tin un uitkering bijwijze van pensioen cu ta bin na remarca pa un aumento di vakantieuitkering, lo wordo paga den forma di un gelijkbedrag.
Despues di 1996, den tur protocol cu a cumbini te cu 2013, casi 20 aña largo, a keda stipula cu pensionadonan ta wordo paga e gelijkbedrag y e bashipremie.
Ta un debe cu gobierno tin cu e ambtenaarnan y si bo tin un debe, bo tin cu pag’e.
Pensionadonan por haya solamente bashipremie y gelijkbedrag, pasobra vakantieuitkering y ATVdagen no ta aplicabel pa nan mas. Pesey a keda cumbini tambe, cu e pensionadonan cu no ta bin na remarca pa ATVdagen, ta haya e porcentahe di ATVdagen den nan gelijkbedrag.
Awor a bira cu e gobierno anterior ta colga e bashipremie y gelijkbedrag na e duurtetoeslag. Pasobra den e punto 12 di e protocol di 2014 ta poni cu duurtetoeslag no ta bay conta mas.
Kico gobierno ta bisa?
Door cu e duurtetoeslag no ta conta mas, no mester paga bashipremie y gelijkbedrag mas. Pero gelijkbedrag y bashipremie ta sali di indexering cu gobierno a keda debe ambtenaarnan. Gelijkbedrag y bashipremie, no tin nada di haci cu e duurtetoeslag.
Duurtetoeslag ta un componente di pensioen. E ta apart. Directie wetgeving & juridische zaken, pa medio di un conseho na gobierno, di dia 2 di Juni 2017, a pone bon cla na punto 6, “Duurtetoeslag heeft een andere oorsprong dan het gelijkbedrag en de bashipremie en kan niet worden gelijkgesteld met de laatste twee uitkeringen. Dit betekent dat het gelijkbedrag en de bashipremie niet onderdeel van de duurtetoeslag worden beschoudt.
Duurtetoeslag tin un otro origen cu e gelijkbedrag y bashipremie. Pesey no por wordo trata igual cu e gelijkbedrag y bashipremie. Esaki kiermen, cu e gelijkbedrag y bashipremie no por wordo considera como un parti di e duurtetoeslag.
Gelijkbedrag y bashipremie no tin nada di haci cu duurtetoeslag. Esaki ta nifica cu e argumento, e motibo di gobierno anterior, a usa pa stop pagamento di debe den forma di gelijkbedrag y bashipremie na e pensionadonan cu a bay cu pensioen riba of despues di 1 di Januari 2015, no ta valido mas, no ta conta mas.
