Dialuna 23 di September ultimo Leerorkest Aruba a start sali cu su proyecto piloto na 4 scol basico di Aruba den 4 diferente districto.
E proyecto piloto a encera en total 3 scol di SKOA y 3 scol publico cu un programa di canto pa muchanan di 2de klas. Un total di mas o menos 375 alumno a participa den e prome siman. Uzando e metodo di Leerorkest Amsterdam, cada docente a base di nan mes experiencia y habilidad a desaroya nan prome siman di les. Esaki a tuma luga cu un entusiasmo enorme na unda nan a sa di envolvi tur participante activamente den e lesnan.
Tambe tabata na Aruba e director di Leerorkest Amsterdam, Sr. Marco de Souza, encarga cu e maneho y ehecucion di e proyecto,conhuntamente cu e grupo di trabou ministerial bou di presidencia di Sr. Johnny Croes. Hunto cu Sr. de Souza a haci un bishita di trabou cerca Minister mr. Andin Bikker p’asina informa Gobierno di e desaroyonan cu e proyecto y nan sugerencia pa e resto di e trayecto.
Durante e siman venidero e grupo di trabou lo raporta por escrito na Ministronan di Husticia Mr. Bikker y di Educacion Dr. Amando Lampe encuanto e proximo pasonan pa cumpli cu tur exigencia rekeri di Leerorkest Amsterdam p’asina logra subsidio Hulandes pa e proyecto a largo plaso.
Pa e grupo di trabou ta un placer y honor pa traha riba e proyecto aki y ta dispuesto asumi e rol di “oprichtingsbestuur” p’asina logra desaroya un Leerorkest Aruba pa muchanan di scol basico den cual tur participante, por medio di e metodo aki, lo por desaroya nan abilidadnan pa scucha, conta, comunica cu otro y logra engrandece nan talentonan riba tereno musical en especial.
Di parti di Gobierno di Aruba e Ministerio di Educacion bou di liderazgo di Ministro Lampe a duna tur su sosten y apoyo pa a bin cu un “verkenningsnota” y ta subsidia e projectleiding pa cu e desaroyo di e Leerorkest.
