Diasabra y diadomingo a capta ladronnan cu a drenta den Fresh Market na Paradera. Un auto marca Toyota modelo Tercel color berde cu number conoci pa Polis ta moviendo cu un grupo di ladron den dje cu ta pasa horta cosmetica, alcohol y diferente producto mas. Nan a bishita Fresh Market diasabra anochi y comosifuera poco, nan a bolbe diadomingo atrobe! Na ambos ocasion a informa Polis, ta trata di dos hende homber y dos hende muhe. Nan ta yega den e mesun auto pero ta drenta separa den e supermercado, pa despista e trahadonan. Diadomingo a yega den un otro auto.
Riba camara por mira con nan a horta desodorante y boter di rom, mas algun otro producto dificil pa identifica den e grabacion. E homber cu a yega prome a bisti flanel ora el a baha di auto. Paden el a horta henter un wiel di keshi Hulandes y a sali sin paga. E muhenan a horta cosmetica y hinca den tas. Clientenan den e supermercado a identifica e grupo aki como clientenan cu ta frecuenta un cas na Shiribana cu ta bende droga. E investigacion awor lo continua.
