Diabierna ultimo, Kiwanis Club of Palm Beach tawata anfitrion di su di 2 edicion di “Over the Moon” charity golf na Tierra del Sol. Contribuyentenan a hunga golf y participa den otro actividad bou di luna yen cu e meta pa recauda fondo pa sigui sostene proyectonan di Kiwanis Palm Beach. Pero specialmente e proyectonan emblematico: “StimaMi GuiaMi” y “Child Car Seat”.
E teamnan a subi cancha di golf, pa e asina yama “Tee-Off”, cual tawata planea pa 7:30pm en punto, y asina duna inicio na e competencia. Teamnan di 4 hungado, den formato di e asina yama “4-man scramble” a haya nan balanan estilo “glow in the dark” y nan scorecard p’asina na final por a saca e team ganado.
Chipping, putting, Closest to the hole
Despues di e competencia riba e cancha di golf di Tierra den Sol, e contribuyentenan a topa otro
den patio di e restaurant pa disfruta di un dushi cuminda y algo di bebe.
Aki ta caminda a cuminsa di biaha cu e competencia di “chipping”, “putting” y “closest to the pin”.
Mester menciona cu e parti competitivo aki ta hala hopi atencion bou di e golfistanan, cu e tension y presion necesario.
Un danki ta bay na e patrocinadonan principal “hole sponsors”, cu a haci e anochi uno sumamente exitoso tanto den e aspecto di organisacion, como e aspecto di recaudacion di fondo.
Pa finalisa e anochi a rifa, cu patrocinio di Green Wheels Aruba, un Scooter cu ta 100% Electrico.
No por lubida di duna danki tambe na tur e otro sponsornan y teamnan cu a participa y aporta
na e bon causa aki den forma monetario of den aspectonan operacional y logistica. Bishita e
paginanan di social media di Kiwanis Palm Beach pa haya un impresion completo di tur esnan
cu a haci un contribucion pa haci e evento uno sumamente grandi y exitoso, den cual e meta
final ta pa contribui na e bienestar di nos muchanan di Aruba.
Kiwanis ta para pa muchanan y manera tur actividad di FUNdraising di Kiwanis club of Palm Beach, tur fondo recauda ta bay 100% bek den comunidad. Specialmente nos muchanan cu mester di dje.
E biaha aki, e fondonan recauda lo bai pa sostene “StimaMi GuiaMi”, cu ta un programa den cual e meta principal ta pa reenforsa e relacion entre mayornan y nan yiu(nan).
Alabes den e programa e mayornan ta haya conseho riba tereno di salud den e prome fasenan di desaroyo di e mucha.
E otro parti di e fondonan, lo wordo inverti den e proyecto di “Child Car Seat”, cual proyecto tin e meta pa conscientisa mayornan ariba uzo di “Child Car Seat” pa proteha nos muchanan den trafico.
Pa mas informacion di Kiwanis Club of Palm Beach bishita nos webpage na www.kiwanispalmbeach.com of nos Facebook page na www.facebook.com/kiwanispalmbeach of nos Instagram page www.instagram.com/kiwanispalmbeach
