“El a salba nos awe. Boluntariamente el a yuda nos aki”, asina Hoofdagent di Polis, Vos, a bisa nos awe mainta na e accidente na Santa Cruz, na altura di Rudsen Bar. Kedy Koolman di Don’t Panic Transport pa casualidad tabata pasando eybanda bayendo trabou a dicidi di banda duna un man, sin cu ningun hende a pidi’e. E curason bondadoso y servicial aki merece un mencion special, como e “Persona di Dia” di awe.
Awe mainta pa mas o menos 7:40am, un dumptruck color berde a laga un cargacion grandi di santo y piedra grandi cay riba e caminda di Santa Cruz na altura di Rudsen Bar. E barancanan a causa daño na por lo menos dos auto coriendo tras di e truck, mientras cu e caminda a keda inaccesibel pa trafico. Polis a cera e caminda y a pidi pa DOW bin kita e piedra y barancanan for di riba e caminda.
Pero tempo ta pasa, trafico di mainta ta pisa, causando fila y nada di DOW. Pa colmo otro departamentonan di Gobierno a pasa, manera Santa Rosa, cu a baha kita algun piedra pa nan mes pasa y despues sigui bay, sin duna un man. Como tres otro Bobcat a pasa na e sitio y sin ni sikiera duna un man.
Ta den e situacion ey a presenta Kedy Koolman di Don’t Panic Transport. Cu a baha bay cerca e hefe di Polis na e sitio y pidi’e pa e por yuda haci e caminda limpi, boluntariamente. Polis Vos a bise mesora cu ta OK y danki pa su yudansa, pa por habri caminda bek.
Koolman a baha su Bobcat for di su truck y den algun minuut e caminda tabata accesibel atrobe.
Kedy Koolman merecidamente awe ta e “Persona di Dia”!
