Diaranson a tuma luga un conferencia di prensa caminda cu e conocido dirigente di baseball Karel “Cai Cai” Willems, presidente di ABBA, kende a duna su banda di medaya riba algun articulo cu a sali den corant y tambe social media.
Hopi hende den comunidad cu ABBA ta bayendo malo y cu e ta den explota, etc. Pero ta un situacion cu a wordo crea. Durante e reunion general 2019, tabata bayendo hopi bon. Cosnan a wordo haci cu tiki recurso, den e sentido cu tiki finansas, no tin stukken di e bestuur anterior, no ta mucho tempo sinta.
Baseball a para na November pa motibo di un protesta. Despues di carnaval a sigui cu campeonato di AA. Esaki a yega su final. A klas tambe a yega su final aña pasa y hubenil tambe a yega su final. Tur e liganan menor tambe a yega su final. Den un tempo cortico a haci basta cos, segun Willems. A trece un team internacional Aruba tambe. A kere cu e aña aki cual ta haya un aña completo cu por a traha cu subsidie commissie y cu ASU y otro comisionnan, pa nan por a upgrade baseball, como tambe ideanan cu a bin cun’e. Pero diripiente den e reunion a bin cu un mocion. Ora cu a lesa e mocion, na final a bisa cu ta pidi retiro di e presidente y directiva completo pa cierto puntonan cu directiva no a haya chens di defende su mes cun’e.
Karel "Cai Cai" Willems: Mocion entrega pa baha directiva di ABBA no tabata na su luga
Karel "Cai Cai" Willems: Mocion entrega pa baha directiva di ABBA no tabata na su luga
Click link pa mas: https://24ora.news/30YEUabPosted by 24ora on Thursday, May 30, 2019
Tambe, e procedura cu a trece dilanti tabata un tiki no completo y a haya cu nan mester a haci un investigacion. Mientras tanto e reunion a wordo geschorst. A bay busca conseho y e consehonan ta mustra cu e procedura no tabata bon. Willems como presidente tambe a haya cu no tabata bon. Pesey a declara e mocion eynan como nietig. A sigui cu e reunion. Mayoria di e teamnan di ABBA, miembronan di ABBA, cu si a paga nan parti financiero, a duna un green light pa sigui cu e reunion, sigui cu e proposicionnan cu nan tabata tin.
E reunion a sigui siman pasa den un ambiente super bon. Tur hende den sala tabata contento, manera cu e reunion eynan a bay. Tabata tin invitadonan special cu normalmente ta pasa den basta biaha, cu un tipo di diferencianan asina ta bin dilanti, caminda cu miembronan di cierto entidad ta bin den e reunion.
Tabata tin miembronan di ASU durante e reunion pidi door di ABBA. Tabata tin miembro di comision di hungadonan den e reunion, cu a forma aña pasa, prome cu nan a bay Republica Dominicana.
Tambe nan tabata tin un representante di baseball clasico, esta e veteranonan, cu a invita y prensa tambe, pero nan no tabata tey presente. Tur di nan tabata testigo di e reunion eynan, cual a bay hopi bon.
Esey ta loke cu ABBA ta bezig cun'e. Nan ta bezig ta prik un fecha. A bin un propuesta dilanti pa traha un comision pa e bay investiga si nan ta bisa cu cos ta robes. E relato financiero di 2016, 2017 y 2018 y hasta haci 2019 te Mei, pasobra no tin nada di sconde.
Esun cu tin cu bay haci e trabao ey, lo trece un rapport pa ABBA. E tin cu wordo entrega den 30 dia. Lo tin dos hende cu a wordo apunta door di ABBA. Un ta e tesorero mes. Awor aki tin cinco hende den e comision aki cu ta bay warda te ora cu e tesorero, kende ta den exterior bin bek. A pidi pa por warda te ora e bin bek, e ora nan ta cuminsa traha full head. Tin piensa pa cuminsa e campeonato di Baseball AA definitivamente dia 17 di Juni. E storia cu no tin cen, cu no tin kico, no ta prome federacion cu no tin cen of algo. Baseball ta un deporte hopi popular na Aruba. E dedicacion cu tin cu baseball, segun Willems, no tin cu trata di strob'e.
Teamnan tin cu entrega nan lista, manera statuut ta bisa, dos siman prome. Nan tin te dia 3 di Juni pa entrega nan lista, paga nan contribucion y ta bay cuminsa cu baseball. Tin pensa di hunga dos buelta. Por ta un roundrobin y e final cu semifinal den Augustus. Kier cuminsa cu A klas, pasobra ta menos team, pesey kier a cuminsa cu A klas prome. Y un siman despues di double A, kier cuminsa cu hubenil. Esey ta e plannan cu tin pa 2019.
Na fin di Augustus kier cuminsa cu e liganan menor, cu ta un seccion cu ABBA tin y kier bay tin por ta pa otro aña Augustus, tur cos den running, purbando manera con por mehora e baseball.
