E hecho di e fayecimento di Oldric ‘Justin’ Fernandez Pedra tabata hopi lamentabel, no solamente pasobra e tabata un mucha di apenas 9 aña di edad, pero tambe pasobra e ta un luz riba su mes.
E gusta deporte di velocidad y ta algo cu semper su tata a fomenta den dje, pa e busca su pasion. Awe e restonan mortal di Justin a yega Aruba for di Miami.
A hib’e Ad Patres Funeral Home pa ey prepar’e pa hib’e su ultimo luga di sosiego. Su tata, mama, padrastro y tambe tur e resto di famia tabata tey na momento di su yegada. Ya caba na Merca famia a tene un vigilia na e luga di e accidente, na Biscayne Boulevard, unda a rindi honor na e hobencito aki, cu na un manera tragico a perde su bida.
Tata di Justin, esta Oldric Fernandez Pedra, a conta cu Justin tabata un bida riba su mes. E tabata gusta speed, gusta deporte. E tata a haci diferente deporte cun’e, unda cu finalmente a bin haya e deporte cu e gusta. El a practica karate, baseball pero na edad di 5 aña el a namora di Karting. E tabata entusiasma cu e deporte y tabata gana trofeo tras di otro. Tur ora e gana un trofeo, e ta dedik’e na su tata. Tur careda el a dedica na su tata y p’e mes.
Nan a traha duro pa tur careda cu full team Paesch, cu semper a para su tras. Tur a bay cun’e den tur su logronan den competencianan. Y awo e no tey mas.
Diasabra awo lo bay ta su ultimo careda, unda cu e lo bay na su ultimo luga di sosiego. Ta invita henter e pueblo di Aruba pa bin dispidi prome cu e bay sosega pa semper.
Justin tabata un mucha cu a bay representa Aruba y a pone Aruba su nomber zona den exterior. E tabata un mucha hopi talentoso den loke ta su deporte y e pasion cu e tabata tin p’e. No ta cuestion cu e tata ta bis’e bay, pero ta e mucha mes tabata kier bay train. E mes tabata bisa e tata pa bay prepara. E ekipo ta prepara su autonan prome cu e yega, pa por subi pista y haci loke tin cu haci. Cada biaha ta bay wak su tempo.
Justin tabata un mucha contento y a considera su tata como su miho amigo. Nan tabatin un laso sumamente estrecho. E dolor cu e tata ta pasando aden, ta inexplicabel. E tabata su piloto, e tabata su yiu, e tabata su bida. Oldric Fernandez Pedra tin mas yiu, pero Justin tabata tur cos p’e.
Ceremonia
Diasabra awo e ceremonia lo ta na Misa Santa Teresita na San Nicolas, for di 4’or di atardi. For di eynan por aprecia su auto, su trofeo y logronan cu el a yega di gana den su competencianan. Nunca el a perde y semper el a coy prome luga. Justin semper ta bisa cu e ta bay core pa e gana. E ta demostra esey semper cu su talento riba pista. Despues di e santo sacrificio di misa, lo hiba e resortnan mortal pa Santana publico na Sabana Basora.
Gradicimento
Tin asina hopi hende para tras di Justin, asina hopi hende cu kier Justin bon. Ta un mucha cu e ta yega y horta Bo curason. E tabata asina alegre. E ta yega pista y tur otro team tabata adore. Tur otro team cu no ta team Paesch tambe tabata cun’e, pasobra nan sa cu e ta un mucha hopi alegre. E tabata gusta su deporte hopi.
