Jurney Tromp awe a huramenta den Corte como abogado. E ta uni su mes na Carlo Law Office, funda pa Anthony Carlo.
E ceremonia a tuma luga den oranan di mainta den presencia di famia di e abogado y tambe miembronan di e bufete Carlo, esta Anthony y Vito Carlo.
Despues cu Jurney a finalisa VWO na Aruba, a dicidi di studia ley aki mes y despues a bay Hulanda, unda despues di core stage el a keda apasiona cu ley penal y civil. “Semper mi tabata gusta pa yuda hende. Den abogacia e no ta bay solamente pa yuda, pero tambe pa trece un cambio, duna un paz mental. Ta traha pa e totalidad. Pero tambe yuda pa un comunidad sa su derechonan.”
Derecho penal ta algo cu semper a atrae. E ta mir’e como un oportunidad pa yuda un persona sali di un situacion dificil den su bida. E parti civil ta atrae di por actua manera como un intermediario pa trece un solucion entre dos partido cu tin opinionnan diferente.
E ta bay traha cu un persona di hopi aña di experencia den e ramo aki, esta Anthony Carlo, kende tabata traha como fotografo di prensa ora cu el a dicidi pa sigui studia ley, cual ta algo cu semper el a gusta. Carlo tin conseho na Jurney y tur otro cu kier studia ley. “Jurney ta un hurista cu ta priminti hopi, ta un detayista. E ta hopi curioso. Pa esnan cu kier bay studia abogacia, mi ta conseha nan lesa tur “rechtspraak” cu ta poni den nan estudio. Lesa hurisprudencia, bo ta siña con pa skirbi y formula bon, analisa y profundisa riba e tema,” e veterano di ley a comenta.
Jurney lo bay traha cu tata y yiu, ya cu Vita Carlo tambe ta forma parti di e Bufete. Un hoben abogado cu un bon trayectorio poni caba. Y si e bisa “Jurney ta e proximo pitbull den casonan penal. Fiscal y Huesnan mester ta prepara”, ta bisa hopi caba. E tin palabra positivo so di loke el a experencia te awo di Jurney Tromp.
Pabien y exito na e abogado nobo aki.
