Desde prome di september proximo, Joost Meijs di Hulanda lo asumi e funcion di Chief Executive Officer (CEO) na Aruba Airport Authority NV. E ta tuma e puesto over for di James Fazio, cu a opta pa regresa New York y pa sigui cu su carera eynan despues di 5 aña. Schiphol Group a dicidi pa acerca Meijs, cu ta traha pa Eindhoven Airport, compania cu Schiphol Group ta 51% doño di dje.
Joost Meijs a studia na Universidad di Groningen entre aña 1989 pa 1995. E ta domina cuater idioma, esta Ingles, Aleman, Portugues y Hulandes.
El a traha den su carera como Project Manager, Commercial Director, Business Unit Manager, a fungi den Hunta di Supervision, etc. Desde maart 2006 e ta traha pa Eindhoven Airport NV como Director Commercial Services & PR. El a crece bira Director suplente y desde october 2008 e ta den e funcion maximo di Chief Executive Officer (CEO).
Eindhoven Airport NV ta e di dos aeropuerto di Hulanda, manehando 5.7 miyon pasahero den aña 2017. Esey ta dobel di Aruba. Asina mes e cantidad ta menos di Schiphol, cu ta maneha 68 miyon pasahero anualmente. Ta uza e Aeropuerto pa trafico civil y militar.
Aruba Airport Authority NV a caba di prolonga e contract cu Schiphol Group pa 5 aña mas. Un di e proyectonan mas importante pa Aeropuerto y pa henter economia di Aruba ta e proyecto “Gateway 2030”, cu ta representa un inversion di mas o menos US$ 275M.
