Fraccion di AVP, representa pa lider di fraccion Jennifer Arends-Reyes y parlamentario John Hart, tabata presente na apertura oficial di e aña academico nobo di Universidad di Aruba.
E ceremonia a marca un momento importante pa studiantenan, rector, docentenan y tur e profesionalnan y colaboradonan cu ta contribui diariamente na calidad y desaroyo di educacion superior den nos pais.
Segun Fraccion di AVP, Universidad di Aruba tin un rol esencial den formacion di nos hobennan, desaroyo di talento local y preparacion di e profesionalnan cu nos pais tin mester pa enfrenta e desafionan di presente y construi un futuro sostenibel.
“Cada studiante cu ta sigui desaroya su mes ta contribui na un Aruba mas fuerte, prepara y resiliente. Educacion ta habri porta, crea oportunidad y duna nos hobennan e conocemento y confianza pa aporta activamente na progreso di nan pais,” Fraccion di AVP a expresa.
Pa Fraccion di AVP, inversion den enseñansa y desaroyo di conocemento mester keda un prioridad nacional. Educacion superior mester sigui conecta cu e necesidadnan real di mercado laboral, sin perde di bista e cambionan tecnologico y e retonan social y economico cu Aruba ta enfrenta.
E fraccion ta considera importante pa sigui fortalece colaboracion entre Universidad di Aruba, gobierno, sector priva y otro institucionnan educativo. Un conexion mas estrecho entre educacion y practica por crea mas oportunidad pa studiante, stimula innovacion y contribui na un mercado laboral cu ta prepara pa futuro.
Na ocasion di apertura di e aña academico nobo, Fraccion di AVP ta desea tur studiante, rector, docente y colaborado di Universidad di Aruba hopi exito, sabiduria y perseverancia. E fraccion ta reitera su compromiso pa sigui sostene iniciativa cu ta amplia oportunidad educativo y fortalece capital humano di Aruba.
