E fraccionnan Accion21, MAS y RAIZ a traha hunto riba concepto di ley di matrimonio di mesun sexo y a entrega esaki na Presidente di Parlamento. Tur hende mester corda kico ta e agenda dje tres partidonan cu ta tras dje ley.
Joël Jansen, pastoor di Hesus Biña Nobo, a splica cu e pueblo di Aruba ta lubida hopi lihe. “Aki poco dia tin eleccion y boso tin di scoge pa ken boso ta vota”, tabata su palabranan. Por mira caba kico ta nan plan y agenda. No mester por lubida kico nan ta tra’i dje y e consecuencianan cu ta bay bin.
E ta haya cu mester marca nan y publica nan. Jansen a pone cos riba su Facebook y e no tin miedo di haci esey. “Ora bo kier bisa cosnan bon, nan ta yama bo homofobico. Nan ta bisa bo tin un hate speech”, el a indica. Cuenta cu bo tin monton di cos, pero esey no ta e punto.
Nan ta kere cu tin respet, balor y moral. Aki ta un pueblo cu mester respeta. Di mesun manera cu nan kier respet, e Iglesianan Cristian Aruba (ICA) tambe kier esey. No ta cuenta di cana con cu ta y pretende cu ICA ta keda keto, soporta y risisti tur loke nan kier. Mester corda cu e tres fraccionnan aki tin nan agenda.
