E di tres edicion di e competencia “Strongest man of Aruba” na MooMba Beach, tabata un gran exito.
El a cuminsa diabierna, dia 28 di September y a finalisa diadomingo dia 30 di September. Tres anochi mustrando forsa di boluntad, forsa increibel, musculonan tembloroso, biceps hincha y otro partinan di curpa bon entrena.
elementonan manera Barrel Throw, Truck Pull, Stone Run, Log Lift, Yoke Carry y Tire Flip, a wordo desafia pa 15 participante.
E final di diadomingo a cuminsa cu un yoke Carry, sigui pa un surprise parkour di truck pull, tire flip y finalmente e stone run. E gran cantidad di sostenedornan a apoya e 7 finalistanan, mientras cu nan a completa e duro trabao pa lanta tres piedra di 80 kilogram riba pilar di pallet.
E ganado absoluto di e competencia ta Jerry Geerman, kende a gana tur e elementonan den e curso di tres dia, cu excepcion di uno. Door di a gana e final parkour, el a seya e deal y wordo corona merecidamente como e Homber mas Fuerte di Aruba. E prome finalista ta Patrick Brugmans y e di dos finalista ta Justin Dekker.
E fiesta a sigui na MooMba bar mientras cu Travel Sessions band a subi stage y a anima e fiesta. E competencia di The Strongest Man of Aruba tabata posibel door di Nagico, Marina Real y Amstel Bright como tambe Fresh FM, Cas di Mas, High Performance y Aruba Wine and Dine. E organisacion ya caba a confirma cu lo bay tin un di cuater edicion na 2019.
