Glennsyl Albertina (Chucho), promotor G.A. Bookings & Events, ta encarga cu Insomnia cu e aña’ki ta celebra su di dies edicion na Hulanda.
E ta un evento masha conoci bou di Hulandesnan Caribense residencia na Europa. Ainda e ta corda e prome edicion den cual a participa e gran artista di Aruba Jeon, kende e aña’ki un biaha mas lo t’ey presente.
Chucho ta contento cu hopi artista di e region ABC a dal nan prome paso grandi den Insomnia. Y awe cu ta un decada di celebracion nan tabat’ey hunto atrobe riba escenario. Por menciona entre otro, ademas di Jeon (kende e tempo ey a presenta bou di e nomber Biggy Boy), Chris Strick, Caché Royale, B’Jay, DJ Krokzz, TSean y hopi mas.
E mision ta pa promove tur e artistanan di e islanan ABC.
Den e evento cu a tuma luga den Maassilo (un ex-silo), tur e cantantenan a presenta cu e temanan cu a bini cu nan den nan presentacion anterior. Un anochi grandi e tabata.
Insomnia ta un concepto unda cu ta uni artistanan di islanan ABC, e union di e islanan. E ta un evento 100% Papiamento pa caracterisa su meta. Cada isla sa tin nan fiestanan apart pero ora cu kier haya algo di tur e islanan hunto, esey ta Insomnia ta percura p’e.
Jeon ta un nomber grandi den e proyecto Insomnia. E tabata un di e prome artistanan cu a duna un show ora cu e concepto di Insomnia a wordo lansa. “E show a bay hopi bon mes,” tabata e prome palabranan di Jeon na final di anochi. Esaki ta di su shete presentacion den Insomnia.
E anochi aki tabatin un primicia. Jeon a presenta su cancion “Miss Dior” cu ta su mas ultimo produccion. A lansa e cancion aki dos siman pasa y tin rond di 140 mil views caba riba Youtube. Pero den publico tabata prome biaha cu a toca esaki den Insomnia.
“Mi ta contento cu mi ta den un era, den mi carera, cu mi tin un circulo di fanatico hopi grandi na Hulanda.”
Dia 6 di october awo lo tin su prome toca Villa Thalia y dia 16 di e luna aki e lo tin su prome presentacion na Spaña.
B’Jay (Corsou) ta otro artista cu a presenta y tabata masha contento pasobra “e publico a biba cu mi”. El a presenta su hitnan mas grandi y “a logra pone e publico gosa. Mi ta hopi gradicido na ciudadanonan di tur e islanan,” el a bisa.
E Festival (indoor) a tuma luga diasabra den Maassilo na Hulanda.
