Post Aruba N.V. a celebra 10 aña di servicio di Jane de Cuba, Verouska Blanco y Xavier Maduro den compania di famia y coleganan.
Jane a cuminsa traha dia 1 di februari 2009 como Telegram Medewerkster y actualmente ta trahando den e departamento di Servicio na Cliente. Jane ta un empleado hopi amabel y atento, no solamente cu e clientenan pero tambe cu su coleganan. Asina cu clientenan drenta e porta di e oficina principal di Post Aruba, Jane ta un di e caranan amabel cu nan lo topa y cu semper tey cla pa yuda nan.
Veroushka a drenta den servicio dia 16 di februari 2009 como Financieel Administratieve Medewerkster y actualmente ta fungi como Medewerkster Interne Controller. Veroushka ta un persona responsabel, puntual y serio den su trabou, cualnan ta caracteristicanan hopi importante pa su funcion caminda e tin cu controla hopi cifras. Pero apesar di su seriedad e tin un bon relacion cu su coleganan.
Xavier a cuminsa cu Post Aruba riba 5 di januari 2009 y ta eherce e funcion di besteller. Xavier su trabou ta uno pisa, caminda cu tur dia e tin diferente reto riba caminda manera e solo fuerte, trafico y cachonan los riba caya. Pero a pesar di esakinan, Xavier ta haci su esfuerzo tur dia pa eherce su trabou debidamente. Xavier ta un persona hopi respetouso y alabes amical.
Post Aruba N.V. ta contento y hopi agradecido cu e 10 añanan di servicio di Jane, Veroushka y Xavier y ta desea cada uno hopi exito den futuro.
Pa informacion riba servicionan di Post Aruba N.V., bishita e website www.postaruba.com of check nan paginanan riba Facebook, cu ta Post Aruba NV y Aruba Stamps.
