Jacco Vroegop ta bira Director nobo di Hospital

4724

Entrante dia 1 di october 2020, ta nombra drs. Jacco Vroegop como e siguiente director di Hospital. Oficialmente e lo haya e funcion di Presidente di Raad van Bestuur di Dr. Horacio E. Oduber Hospital. Den e Raad van Bestuur lo tin tambe Gregory Croeze como miembro, den funcion di director financiero. A recluta Vroegop na Hulanda y lo reemplasa Freek Korver, cu ta den e funcion di director interino awo.

Raad van Toezicht, cu awor ta bou presidencia di Marco van den Burg, a confirma e nombracion aki den un entrevista cu e vespertino Amigoe di Aruba ayera. El a bisa cu desde 21 di september Jacco Vroegop lo uni na e ekipo di Hospital, pero despues di 10 dia lo asumi e funcion den forma oficial.

Hospital di Aruba a haci uzo di e oficina di reclutacion Klaus Schmitt & Partners na Hulanda. Tambe a uza e oficina di accountant, Deloitte. E ultimo aki a duna un man tambe ora a recluta e director financiero, cu a kita di IMSan pa bay traha na Hospital.

Jacco Vroegop a studia tecnica medicinal na Universidad di Zurich, despues na Erasmus Universiteit a profundisa den “Health Economics Policy and Law” y tambe a studia ciencia politica na Universidad di Leiden, na Hulanda. Awendia e ta director clinico di Worldeye Amsterdam.

Worldeye Amsterdam ta estableci na aña 2017 y ta pertenece na un grupo internacional di hospital di wowo. E clinica ta encarga cu tur sorto di tratamento di wowo. Nan meta ta pa yuda pashentnan di wowo mira atrobe, sin bril of lens, dor di un tratamento di implante y laser.

Jacco Vroegop ta considera su mes un director medico y clinico cu experiencia, cu a demostra den pasado di por traha den un hospital of den e industria di private health care. E ta un experto den negociacion, e ta un lider energetico, ta experto den maneho di cambio y di cuido.