Tabata tres aña pasa cu Movemiento ta Bida a cuminsa cana den naturalesa. Nan a cuminsa cu grupo di 60 plusser.
Ivy Simon, Country Manager na Island Finance Aruba a cuminsa na bisa cu e tempo ey, Ivy mes hunto cu su casa a dicidi di join e grupo, a pesar di cu nan mes no a yega 60 aña ainda.
Tabata na dado momento cu Rudney Leysner, di Movemiento ta Bida a pidi yudansa pa haya sponsor pa t-shirt di e lidernan, pa tin un distincion entre esunnan cu ta cana y e lidernan. Tambe pa esunnan cu ta participa den e caminatanan por diferencia ken ta e lidernan di e diferente gruponan. Asina tambe nan a envolve nan mes den un evento cu di suma importancia pa bida saludabel di un persona.
Island Finance kier contribui na algo asina esencial y importante den hiba un bida saludabel, y sigur nan kier contribui na salud di comunidad di Aruba. Sin laga afo, contribui cu Movemiento Ta Bida, cu e bunita proyecto cu nan tin.
Mas aleu, Ivy Simon a afirma cu Island Finance lo sigui contribui cu Movemiento Ta Bida, door di, no solamente sponsor e t-shirtnan, pero tambe sponsor e flechanan, ora di cana den naturalesa.
Segun Ivy a splica, ora di cana den grupo, mester midi caminda y ora cu e grupo ta asina grandi, tin hende ta cana mas duro cu otro, p’esey ta parti e gruponan. Pa haci e caminata mas facil, ta pone flechanan di indicacion rib’e caminda pa asina ta sigur.
Island Finance ta sumamente satisfecho cu e bunita proyecto cu Movemiento ta Bida ta haciendo y nan lo sigui aporta na nan bunita causa.
Por ultimo, Ivy a extende un invitacion na tur esunnan cu ta participa na e caminata di tur diasabra. Ta Sali 6:00 am en punto. Ta masha disciplina pa cu e orario. No ta warda riba niun hende. Den e ultimo tres ciclo (añanan), a haci esaki. E aña aki, nan a haci esaki pa diesdos siman.
Pa e ciclo aki, lo trece algo diferente, unda lo tene dos caminata pa 6:00 p.m. Rib’e dianan aki, lo tin luna yen (full moon). Un di e caminatanan aki lo ta diasabra awo y lo cuminsa na Yara. Ta pidi tur nan participantenan pa ta hopi pendiente di Facebook page di Fundacion Movemiento ta Bida.
Pa tur esunnan cu ta bin diasabra awo, sinta menos y move mas!
Diasabra ta hopi importante pa bin c’un flashlight, moskito repeller, bin prepara y c’un bon keds, tambe c’un wandelstok, pa tin un apoyo ora di subi e caminda di Yara.
Rudney Leysner, a lanta fundacion Movemiento ta Bida na 2011, cu meta pa haci comunidad di Aruba mas activo.
Ora cu Rudney a baha cu pension, 15 aña pasa ainda e tabata vital cu e por haci actividad pa cual el a dicidi di haci e actividadnan aki.
Actualmente Fundacion Movemiento ta Bida, nan ta den Centronan di Bario, trahando cu adultonan mayor.
Pero un di e partinan cu nan ta haci ta caminata den naturalesa. Esaki a cuminsa na 2012. Pero den e ultimo tres añanan, a concentra mas riba dje. Pero poco poco e grupo, cu a cuminsa cu apenas 15 pa 20 hende, a crece. Comunidad a bira mas activo.
Ora di traha den ciclo, nan ta traha tres ciclo, di 36 siman den cual un persona ta activo, parti den 12 biaha. E aña aki nan a cu cambio, door di bin cu dos caminata atardi, tur otro ta bay ta mainta. Diasabra awo tin e prome caminata di atardi, cual Leysner a bisa cu ta uno hopi bunita, door cu por wak solo baha y tambe salida di luna, e asina yama ‘moonlight’. Ta un caminata di nuebe kilometer, cual no ta bay ta facil. Pero ta un caminata anochi, cual ta hacie mucho mas fresco.
