Ilegalnan deteni pa Guarda nos Costa ta preocupa kico lo bay pasa cu nan

E ilegalnan deteni na Guarda nos Costa tin cu wordo deporta. Nan ta un grupo grandi. Ta hayando informacion cu tin un preocupacion den e grupo aki. Hasta a wordo menciona cu awe, dialuna 25 di Maart, ta bay den un welga di hamber.

Tin preocupacion keto bay: Welga di hamber a start entre ilegalnan deteni pa wordo deporta

Posted by 24ora on Monday, March 25, 2019

Fronteranan ta cera. Hopi di nan a wordo manda via Colombia pa nan yega Venezuela. A logra papia cu algun di nan cu tabata lucht na e momento ey y nan a expresa cu na e momento ey nan ta cera, aunke nan a haci solicitud di asilo.

Tin algun di nan tin varios luna cera. Nan ta haci e solicitud na imigracion, y te ainda nan no tin un contesta. Nan a drenta via di aeropuerto y despues nan ta detene nan riba caya y ta hinca nan na Guarda nos Costa.

Ainda nan ta sigui duna solicitud di Asilo y despues ta gara nan. Nan ta pidi pa resolve esaki. E grupo cu a papia cun’e ta preocupa.

Yonaiker Sanchez, ta sali pa e grupo cu ta preocupa. Manera nos a menciona, tin di nan tin mas cu un luna cera. E ta conta cu e prome preocupacion cu nan tin, ta cu nan no a haya contesta riba nan libertad. Tambe e frontera ta cera. Sanchez a comenta cu tin un convenio, un tratado di Geneve. Tin un protocol y un tratado cual nan tin cu respeta.

Loke tambe e ta condena e forma con nan ta saca periodistanan for di Guarda nos Costa, cual ta un derecho cu nan tin, cual ta e derecho di libertad di expresion. Nan ta violentando tur derecho internacional, unda cu tin a wordo deteni cu certificado di ACNUR. Ta busca pa un respuesta y un solucion pa e problematica aki. Nan ta deteni di forma arbitrario y esey no ta bao di ningun reglamento legal ni huridico.

E convenio di Geneve ta e unico respaldo cu tin pa nan busca un solucion y pa busca un contesta pa e refugiadonan cu ta cera y busca nan libertad.

Welga

E indocumentanan a bay den welga di hamber pa busca un contesta. Segun e grupo, nan tin cu deal cu Trudy Hassel. Ta cuestion pa Trudy Hassel autorisa un entrevista cu nan, cual ta para den e convenio, pa nan mes splica kico ta pasando y cua ta nan peticion y e motibo di e welga di hamber.

Ningun reaccion di gobierno

Sanchez a comenta cu normalmente gobierno no ta reacciona. Esey ta despues di a manda un mensahe pa gobierno riba Plaza Bolivar. E gabinete ta actua cu nada no ta pasando na Aruba. Nan ta tumando e situacion aki, manera cu e cos no ta nada. Esey ta un tiki preocupante pasobra ta tratando di hendenan cu tin un certificado di ACNUR. Ta pidi pa un comision di alto comisionado di ACNUR bin Aruba pa supervisa e situacion aki y pa respeta e convenio di Geneve, cual ta e unico armamento pa por proteha nan mes.

No por mandanan bek

Awor aki Venezuela ta bibando un situacion tenso. Hulanda a reconoce Guaido como presidente interino di Venezuela, e ora nan tin cu busca un solucion pa e Venezolanonan cu ya ta na Aruba y nan no por deporta esnan cu tin e certificado di ACNUR. E grupo ta wordo alimenta cu un glas di awa y pida pan. E organisacion Caribense di Derechonan Humano a bisa esaki y a publica esaki via rednan social y a haci di esaki noticia.

Status di ilegal

Con cu bay bin, e personanan aki tin un status di ilegal. Sinembargo Corsou a aproba asilo di refugio. Nan a laga e Venezolanonan sali cu a pidi asilo. Awo e pregunta ta si gobierno lo mantene e grupo di ilegalnan te ora cu frontera habri? Kico e gobierno tin pensa di haci. Unda nan lo manda nan. Nan no por detene e Venezolanonan aki. Nan no ta criminal, segun Sanchez, pa nan ta deteni na e manera cu nan ta actualmente.

Na Dakota tambe tin hende deteni y na un manera inhumanitario. Ta pone na riesgo e salud di e ser humano, segun Sanchez. No ta papiando aki di hendenan criminal. Ta hendenan civil cu ta core for di e situacion politico y inhumanitario cu ta pasando na Venezuela.