Bao guia di Fiscal di Husticia, Landsrecherche a haci investigacion penal di casonan di soborno administrativo pasivo y falsificacion pa cu e examen Hulandes pa e asina yama “naturalisatietoets” na aña 2012. E investigacion di Landsrecherche a mustra cu un ambtenaar cu (anteriormente) tabata traha na Examenbureau, Maikito Croes, a pidi y a ricibi regalonan (placa) di participantenan na e test di idioma, en cambio pa e falsifica nan resultadonan di examen.
E investigacion a mustra alabes cu Maikito Croes tabatin probecho ilegal for di e echonan castigabel aki. Ministerio Publico di Aruba a dicidi pa resolve e caso penal pafo di Corte dor di palabra cu Maikito Croes cu e ta cumpli cu 120 ora di servicio na comunidad, cu e ta paga un boet di 22.500 florin y cu e ta paga bek e suma obteni ilegalmente di 22.500 florin. A palabra ademas cu e ta acepta su retiro for di trabao y cu e no ta bay aspira pa demanda ningun tipo di daño. Mientrastanto Croes a cumpli cu su servicio na comunidad y a paga e boet.
Stranheronan cu ta desea di haya nacionalidad Hulandes, mester haal e naturalisatietoets aki. E toets ta wordo haci y examina pa e Examenbureau di Departamento di Enseñanza di Aruba, cu ta cay bao Ministerio di Enseñanza di Aruba. E ta consisti di varios parti, bao di cual un testnan obligatorio di Hulandes. Ta precisamente e test aki a falsifica of haci comosifuera cu e stranheronan a pasa e test bon, cu consecuencia cu nan a haya paspoort Hulandes.
Un di e medidanan disciplinario cu Gobierno a tuma e tempo ey, tabata di kita e ambtenaar for di trabou den forma inmediato! Tambe a resulta cu departamento di Enseñanza di Aruba a tuma medidanan pa evita e tipo di fraude aki den futuro mas tanto posibel. For di e investigacion no a resulta, cu e fraude cu a keda constata, lo a hiba na stranheronan cu a haya nacionalidad Hulandes inhustamente, segun Ministerio Publico. Aunke cu nos mester bisa (redaccion 24ora.com) cu nos tin prueba cu no menos di 13 “Hulandes” a perde nan paspoort pa motibo di e falsificacion aki cometi dor di Maikito Croes!
