Awendia pa tur cos tin un app y mas ainda durante di e pandemia aki hopi servicio a bay riba app, pero e presencia di Dios bo no ta hay’e riba ningun app, pasobra Dios no ta cambia e ta mesun Dios di ayera, awe y pa semper.
Ora ta trata asunto di Dios no tin app, Dios nos tin cu busca cu humildad y nada di fantasia. Nos mester dobla nos rudia dilanti di Dios.
Tur hende cu kier algo di Dios mester presenta nan mes humilde dilanti di Dios y cu fe keriendo cu Dios ta capaz di haci locual bo ta pidi. Pasobra ta e forma con bo acerca Dios ta pone su misericordia y su compasion move riba bo bida.
Dios ta wak bo determinacion cu cual bo ta yega den su presencia y esey ta demostra cu bo a yega cu confiansa cerca dje.
Den Marco Capitulo 2:1 -5, cuater homber tabata determina pa hiba nan amigo cerca Hesus. Ora nan a yega na e cas, no tabata posibel pa drenta pa motibo di e multitud di hende cu tabatin paden di e cas. P’esey nan a dicidi di subi riba e dak di cas traha un buraco p’asina por a baha e homber paralitico dilanti di Hesus y Hesus mirando nan fe a bisa e homber “Mi yiu, bo picanan ta pordona”.
E homber paralitico no por a move y hopi biaha tin paralitico cu no por papia. Pero esunnan cu a trece, a bin cu fe keriendo cu Hesus por sanea e paralitico.
Hopi biaha nos ta mira hoben ta logra algo den nan bida, pero nan no sa cuanto oracion nan mayornan a haci pa nan por a logra. Bo ta tende e siguiente frase:
Mi tin fe den mi mes (Esaki ningun caminda ta aparece den Bijbel) of tambe bo tin di yuda bo mes pa Dios yuda bo (Esaki tampoco ta aparece ningun caminda den Bijbel). Frase inventa pa hende pa lanta nan orguyo y asina nan ta lubida riba Dios. (Proverbionan 28:26)
Hende por train y capacita su mes pa logra algo, pero bo mester tin fe den Dios, pasobra ta Dios ta esun cu ta duna bo rosea.
Ningun hende por yuda nan mes sin intervencion di Dios, pasobra ta Dios ta esun cu ta duna bida.
Tur esaki ta causa cu hopi biaha hende kier ricibi milager, pero no kier duna Dios e Gloria.
Tur hende cu a logra algo cerca Dios a hacie a base di humildad y ta asina lo continua pa semper. Ningun hende por dirigi Dios, tur hende mester somete nan mes na Dios y cu humildad y gradicimento haci nan peticion.
Dobla bo rudia sin orguyo y sin murmuracion dilanti di Dios. Orguyo y murmuracion ta tranca tur cos dilanti di Dios.
Pero humildad y gradicimento ta pusha bo peticion hiba dilanti di Dios.
Ta tempo pa nos bolbe bek na rudia y busca cara di Dios, p’asina e yuda nos den tur situacion y nos lo sali victorioso.
