E prestamo di 209 miyon florin cu Aruba a haya di Hulanda, no ta bay como un regalo. Aruba mester paga bek, pero e condicionnan aki ta hopi mas atractivo cu si Aruba a bay fia riba mercado internacional. Hasta e siman aki ainda, prome minister a bisa cu e situacion tabata hopi serio, cu lo no por a paga ambtenaarnan nan salario completo e fin di luna aki, si no a no a haya placa presta.
Poniendo esaki den contexto di tur loke mester bay sosode awo, unda mester controla gastonan compara cu entradanan, Secretario di Estado di Asuntonan di Interno y di Reino a bisa bon cla cu sindicatonan mester cuminsa asumi nan responsabilidad.
Raymond Knops, a representa Hulanda den firmamento di e acuerdo, a enfatisa cu si tin algo cu a mustra bon cla den e crisis causa pa coronavirus ta e puntonan debil di economia di Aruba y tambe di gobernacion cu a bira hopi visibel. “Bo no por sigui haci e cosnan manera semper y kere cu bo ta sali di mes for di e crisis,” Knops a bisa.
El a bisa bon cla cu mester tin un balansa entre entradanan y gastonan, pa tin un finanza publico sostenibel. E ta encera cu mester bini un “doorlichting” di sector publico, evalua su grandura. Si cos keda manera e ta, Aruba lo no por carga e gastonan, e post di gastonan di salario ta hopi halto. No ta bay pa e top salarionan solamente, pero mester yega na un aparato gubernamental eficiente. “Si Hulanda no a bin yuda Aruba awo, lo no tabatin mas apoyo y Aruba lo ta failliet. Ya caba ta 5 pasa di 12 y mester tuma pasonan. Ora cu mi bisa cu tur hende mester tuma nan responsabilidad, no ta papia solamente di e Gabinete y parlamento, pero tambe e sindicatonan. Tur hende mester asumi nan responsabilidad.”
