E siman aki Corte Comun di Husticia (Hof) situa na Corsou, a dicta su veredicto den e caso cu Prome Minister mr. Evelyn Wever-Croes a apela contra e decision di Corte den Prome Instancia (LAR) riba e permiso di construccion di Secrets Baby Beach Aruba. Por corda cu dia 28 di mei 2020, Gobierno a otorga Three Rivers Real Estate VbA un bouwvergunning pa construccion di un hotel na Sero Colorado. Pero, den un decision di dia 5 di mei 2022, minister a declara un obheccion di e ciudadano Werkeman sin base, dia 5 di mei 2023 hues a rechasa e peticion di Werkeman pa pospone e bouwvergunning.
Pues e ciudadano a pidi pa pospone e permiso, pero Minister no a bay di acuerdo cu ne. Ora cu el a bay Corte, tampoco a dun’e rason.
Minister a pidi presidente di e caso di Hof pa tuma un medida temporal (voorlopige voorziening). Esaki ta un proceso apart, banda di un caso di obheccion of apelacion. Den un caso asina ta pidi hues pa un medida temporal. Esaki ta un medida special tanten cu e caso di obheccion of di apelacion ta den tratamento ainda. Por ehempel, pospone rosamento di un tereno te ora cu tin un decision riba e obheccion of apelacion di e prome decision. E caso aki no a wordo ni trata profundo, algo cu e partidonan a bay di acuerdo cu ne. Solamente e hues a analisa e documentonan y tuma su decision.
LOKE HUES A CONSIDERA
Riba 15 di juni 2022 e ciudadano Werkema a entrega apelacion contra e decision di 5 di mei 2022. Pendiente di e apelacion ey y basa riba un articulo di LAR, el a pidi pa schors e bouwvergunning, si e no ta geschors caba basa riba articulo 59 di Bouw- en woningverordening (Bwv). Den e decision di dia 5 di mei ultimo, Corte a rechasa e peticion pasobra e no tin importancia pa e persona. Na opinion di hues, pendiente di e apelacion di Werkema basa riba articulo 59 di Bwv, ya caba pa ley a permiso ey ta posponi.
Loke cu e minister kier ta, pa Hof pospone e decision di 5 di mei, unda a bisa cu e permiso di construccion pa ley ta geschorst caba, te ora cu tin un decision definitivo den bodemprocedure riba e pregunta si berdad e bouwvergunning ta geschors pa ley, basa riba articulo 59 ariba menciona. Prome Minister no ta kere cu esaki ta e caso, pasobra no ta papia di un permiso temporal otorga, pero uno cu condicionnan. Ademas, e prome mandatario ta di opinion cu e Presidente di Corte den su decision di dia 11 di mei 2022, no a bisa cu e bouwvergunning ta geschors pa ley. P’esey e ta bisa cu e decision di Corte ta bay contra esaki.
Articulo 53a di LAR ta bisa: Un apelacion contra un decision di Corte di Prome Instancia di un decision riba obheccion por wordo apela dilanti Corte di Apelacion. Un otro articulo di LAR (54) ta bisa si tin obheccion of apelacion basa riba un ley, e ora e persona por pidi Corte separa pa pospone decision riba e carta di obheccion, pasobra ehecucion di e decision lo por perhudic’e.
Presidente di Corte Comun a bisa cu e peticion di Minister Presidente Evelyn Wever-Croes no ta bay riba un decision riba cual tin un procedura pendiente na Hof. E minister-president a splica cu e intencion no tin e meta pa bay contra e decision di Corte Prome Instancia. Basa riba esaki Hof ta bisa cu no tin e conectividad exigi y a base di esey so caba e Presidente di Hof no por trata e caso. Si tabatin un procedura mes pendiente na Hof, e lo no a sirbi e minister. E decision di Corte riba 5 di mei ultimo ta uno riba un peticion manera describi den articulo 54 di Lar. Contra esaki, basa riba articulo 53a di Lar, no tin Hoger Beroep pendiente na Hof y no ta existi apelacion den e tipo di casonan asina y e prome mandatario, siendo un hurista, ta supose di conoce ley y sa esey tambe! A bisa tambe cu interes general no ta pisa mas di loke ta para den ley. Esaki ta haci e peticion di Minister Presidente Evelyn Wever-Croes no admisibel.
THREE RIVERS NO TA RESPETA DECISION DI HUES
Cu esey e proyecto ta bolbe cay atras den e agenda stipula na un principio. No ta prome bes cu bisiñanan ta logra pa corte para e trabounan y declara e “bouwvergunning” nulo. Echo ta cu e compania cu ta desaroyando e proyecto hotelero “Secrets” na San Nicolas, yama Three Rivers Real Estate VBA, funda dia 28 di juni 2004. Nan director, ta nada mas y nada menos cu Arulex Trust Services di e bufete di abogado Croes, Wever & Ruiz y nan oficina principal ta situa den Wilhelminastraat 61-63.
E tipo di casonan asina, corte tambe ta realisa, cu ta cerca di e limite di “conflicto di interes” pasobra di un banda ta Minister Evelyn Wever-Croes ta politicamente responsabel pa DOW cu ta otorga “bouwvergunning” pa e hotel mientras cu e bufete di su mesun tata ta defende e hotel como nan director. De facto, e proyecto a haya permiso pero ta e bisiñanan ta persiguiendo nan, alegando na corte cu Secrets a haya permiso sin cu e ta cumpli cu ley of por haya dicho permiso. Mirando ken ta nan abogado y director, no por kita for di e ‘percepcion’ cu cosnan por ta bayendo mas facil of por lo menos sin contratiempo na banda di DOW!
BISIÑANAN TIN PROBLEMA CU E PERMISO DI CONSTRUCCION
E casonan a cuminsa cu otorgamento di permiso di construccion pa e hotel aki den Sero Colorado (Colony). E grupo di habitantenan a entrega obhecion y minister a bisa cu esaki no tin base. Atrobe dia 15 di april 2021 nan a bay den apelacion. Den e caso di algun a haya cu e demanda no tin base y den dos otro caso si. E momento ey corte a bisa cu den tres luna di tempo minister mester tuma un decision riba nan peticion. Tanto minister como desaroyado di e proyecto Secrets a apela e decision ey.
A PIDI PA “SCHORS” E PERMISO DI CONSTRUCCION
Den cartanan di 4, 10 y 18 di november 2022 a pidi minister pa actua riba e preocupacionnan cu nan tin. Como cu no tabata tende nada, dia 7 di maart ultimo a entrega un carta di obhecion. E peticion ta pa schors e permiso di construccion numera BA-0994- 2019. Nan ta basa nan mes riba e echo cu e plan di construccion riba diferente punto ta en pugna cu ley civil, principalmente pa loke ta e ROPV.
E DISPUTA DEN CORTE AWO
Huristanan di Gobierno a splica cu e caso aki no tin urgencia mirando cu e construccion ta realisa pa un 45% caba. Y a rechasa e ponencia cu e plan di construccion no ta cuadra cu ley. Corte a bisa cu no ta berdad cu e demandantenan no tin urgencia cu nan peticion, djis pasobra cu e trabou a avansa pa un 45% caba. E pregunta ta si e bouwvergunning no ta posponi caba a base di articulo 59 di Bwv. E ora si e demandantenan no tin ningun motibo pa pidi corte pa schors e permiso di construccion (manera cu nan demanda ta).
E DIFERENCIA DEN SECRETS Y EMBASSY SUITES
Ta nota un si cu tin un diferencia grandi den e forma con e Minister Presidente, cu alabes ta Minister di Infrastructura ta atende cu dos proyecto similar cu ta pendiente permiso. Esun Embassy Suites by Hilton Aruba ta den un lucha pa por keda cla cu un pida beach dilanti su edificio. E mesun beach cu DIP a duna permiso pe na 2019 y awo ta hala atras y purba stanca e proceso. Ey DOW y DIP no ta riba e mesun liña y conflicto personal entre e dos directornan awo tin e proyecto secuestra. Ey e minister a bisa cu e no por mete, e no ta duna tereno y e no ta bay contra e expertonan di DOW y DIP.
Pero…di otro banda…e grupo Secrets Baby Beach Aruba, cu ta afilia na e bufete di abogado Croes, Wever & Ruiz tin miho suerte. Separa cu nan permisonan a core riba rolschaats, awor cu hues a para construccion, nan a conta cu no solamente tur sorto di sosten den gobierno, sino cu e Prome Minister a subi trapi bay hues pa defende nan interes y nan proyecto tambe. Ta masha inisual cu Gobierno ta reta corte di LAR asina dna Hof y esey presidente di Hof a skirbi tambe den su decision, cu gobierno sa masha bon cu no ta existi apelacion den e tipo di casonan asina di LAR y cu mester respeta sentencianan di corte. Pero ta cuanto interes gobierno por tin anto den e proyecto pa bay asina leu pa pasa berguensa den corte? Kico Secrets tin cu e inversionistanan di Embassy no tin?
TOCANTE SECRETS BABY BEACH ARUBA
Tabata na november 2019 cu AMResorts®, un compania di Apple Leisure Group® (ALG), a anuncia un acuerdo nobo pa construccion di 600 camber pa e proyecto Secrets Baby Beach Aruba situa cerca di Baby Beach, na San Nicolas, como parti di e cadena di Secrets® Resorts & Spa. E grupo tras di e proyecto ta Grupo Martinón, estableci na Aruba via e compania Three Rivers Real Estate VBA.
E intencion ta pa traha 600 camber prome, evalua e proyecto y despues amplie cu 300 camber mas! Ora a anuncia e proyecto na november 2019, a bisa cu lo cab’e na final di aña 2021. E proyecto completo ta costa alrededor di 200 miyon dollar Mericano. Pero, pandemia y despues batayanan legal den corte ta haci cu awe na 2023 ainda falta bastante ainda pa por finalisa e hotel gigantesco aki!
E hotel ta destina solamente pa adulto y lo ofrece e concepto conoci como un vakantie exclusivo “Unlimited-Luxury®”, cu ta cubritur e opcionnan di cuminda y servicionan den e hotel, cu ta inclui oferta di cuminda estilo “gourmet a la cart” sin reservacion, servicio di cambernan y roomservice 24 ora pa dia, bebida sin limite, mini bar den camber, actividadnan y entretenimiento nocturno “live”. Y tur e servicio y actividadnan aki ta inclui, pues no mester ni sali cu tas of cartera!
E grupo Apple Leisure Group® (ALG) ta un di e companianan principal di tours, biahe y hospitalidad di Merca. Via su compania AMResorts® nan a desaroya of ta desaroyando proyectonan hotelero grandi den Caribe, manera ta Dreams Curaçao Resort, Spa & Casino y pa no lubida Secrets St. Martin Resort & Spa.
Siendo un compania reconoci como un lider den e mercado di hotelnan “All Inclusive”, awendia AMResorts® ta maneha 66 hotel di e marca aki cu como 9000 camber den pleno desaroyo. E compania ta posee como 24000 camber bou varios marca di hotel na Mexico, den Caribe, Merca y Spaña.
