Un informacion cu a bin dilanti ta cu Hubert Solagnier di Arubaanse Voetbal Bond (AVB) pidi su retiro definitivo di su posicion como secretario general. El a entrega su carta di retiro cu lo drenta na vigor dia 21 di december 2023.
A purba di acerca Solagnier pa haya su confirmacion riba e carta cu el a entrega diamars mainta. Pero el a nenga di duna comentario. Presidente di AVB, Randolph Lacle, a bin dilanti y a bisa nos reportero cu e no ta bay duna comentario riba e carta di retiro.
Solagnier tin nuebe aña ta traha na AVB. E tin un aña y ocho luna a eherciendo e posicion di secretario general.
Tocante AVB
A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.
Tocante Hubert Solagnier
Hubert Solagnier ta forma parti di Arubaanse Voetbal Bond pa nuebe aña. Despues di e ultimo eleccion, a scoge como secretario general, cual posicion cu e ta fungi desde januari 2022. Pa ocho aña, desde januari 2014 te december 2021 Solagnier tabata miembro di directiva di AVB. Tambe di 2010 pa 2011 Solagnier tabata e director di desaroyo tecnico (Director of Technical Development) di AVB.
