Diaranson atardi tabata un dia di celebracion. Cruz Cora a haya un bunita donacion for di Hua Hing Food Center, cu a habri su portanan oficialmente e siman aki. Den cuadro di nan apertura, a dicidi di duna nan contribucion na comunidad y a toca honor na Cruz Cora cu lo reparti esaki, entre otro na FPNC pa ricibi esaki.
Representante di Hua Hing, Ludwig Leito, a bisa cu e ta un alegria pa nan pa haci e donacionnan aki. Nan a habri nan portanan pa publico dia 10 di October caba, y mirando cu nan ta un supermercado pa pueblo a dicidi di contribui cu comunidad. Nos meta ta pa sigui yuda pueblo, el a bisa. A recorda cu nan ta tey pa pueblo pasobra nan tin premio tur dia, y tin descuento special pa personanan riba 60 aña y esnan cu ta haya onderstand.
Tracey Werleman, coordinado social di Cruz Cora, a gradici masha pa e donacion. Masai, e director, a yama nan pa informa nan di e donacion. Cruz Cora tin 8 mil famia cu a acerca nan den e temporada aki pa ayudo di alimento. Y e yamadanan ta sigui drenta tur dia.
Gianaika van der Biezen, director di Fundacion pa Nos Comunidad, tabata presente y a splica e donacion aki ta bay pa e paketenan di alimento cu nan ta traha pa tur e famianan den necesidad. Nan tin un cantidad grandi di persona registra y nan ta traha hunto cu Cruz Cora pa e ayudo necesario yega cerca esnan den necesidad.
FPNC tin tres punto di distribucion na Playa, San Nicolas y Kibrahacha unda cu voluntarionan ta traha y distribui e paketenan, segun e lista cu nan tin. Tambe nan ta traha hunto cu otro fundacionnan cu tambe ta yuda ciudadanonan na Aruba.
