Colega di HOH Milka Wernet a cana drenta e sala di reunion pa un supuesto meeting y no a sospecha net nada. Un sorpesa grandi ora cu ela ripara presencia di personal di siguridad, coleganan di comision di calamidad y di ‘Hulpverlenersteam’, di Facilitair Bedrijf y Hunta di Directiva cu hunto a bisa ‘surprise’. Tur luna Horacio Oduber Hospital (HOH) ta reconoce un colega cu a resalta door di pone den ‘spotlight’ y pa luna di september 2023 a toca turno na Milka Wernet cu ta manager di siguridad. Diariamente Milka ta traha cu un grupo grandi di colega y tur hunto a haya cu Milka merece e bunita reconocemento aki cu a lag’e emociona.
Pa siguridad durante calamidad y tambe durante temporada di mal tempo Milka semper t’ey. E t’ey pa tanto personal y pashent unda cu e ta yega trabou cualkier ora pa sigura cu tur cos ta cana manera mester. Semper e ta cla pa yuda y ta actua rapido pa cu un trabou. Milka ta ponebo sinti sigur y coleganan ta haya cu Milka tin un bon curason cu kier pa tur hende progresa y crece den bida. E ta un persona cu ta bay diferente curso pa keda’ up-to-date’ pa mehora su trabao unda cu e por y asina eleva e calidad di cuido y tene clientenan contento. Milka Wernet ya caba tin 30 aña den servicio di Hospital.
Ela cuminsa labora na HOH den e posicion di voedingsassistent pa despues bira teamleider y asina sigui crece den funcion unda cu ela bira ‘hoofd Huishoudelijke dienst y telefonie’ y actualmente ta eherce e funcion di Manager beveiliging. Parti di su funcion ta pa percura pa siguridad di pashent, bishitante y empleado y tambe zorg pa e plan di emergencia di HOH ta ‘up-to-date’ cu ta basta trabou mirando cu ultimo tempo Hospital a conoce diferente mudamento. Tambe e ta percura pa tur alarm ta traha pues continuidad di tur parti di siguridad pa asina Hospital tin tur cos ‘in place’ pa cualkier eventualidad.
Banda di su funcion e ta forma parti di diferente comision na Hospital entre otro e comision di Calamidad y alabes e ta na cabes di e comision di Hulpverlenersteam (HVT). Milka ta coordina training pa HVT y tambe constantemente ta organisa diferente training pa ful Hospital manera e training obligatorio con pa paga candela y tambe evacuacion. Hasta pafo di Hospital tambe e ta duna training di agresion. Ademas e ta yuda organisa hopi evento y actividad manera e conocido HVT Games, HVT Beach Tennis, caminata di HVT, bowling y hopi mas.
Hunta di Directiva y ful team di HOH ta hopi contento di tin Milka como colega. Milka ta un tremendo ehempel di nos slogan ‘Nos semper t’ey’ pa su dedicacion na siguridad den cuido medico di Aruba. Masha pabien Milka!
