Dia 17 di november tabata un dia hopi special pa Fundacion Hospice Atardi, ya cu nan a cumpli tres aña di existencia. Na 2018 nan a habri porta di e Hospice, cu ta un concepto nobo pa Aruba. Na februari 2019 a ricibi nan prome huesped.
Segun coordinador di e fundacion, Matsy van Oers, e concepto aki no ta nobo na mundo, pero pa Aruba e ta algo nobo. A ripara hopi hende na Aruba ainda no sa precies kico Hospice Atardi ta haci.
Van Oers ta splica cu Hospice no ta un cas di cuido. Hospice ta un luga special pa hende cu ta den e fase final di nan bida. Pa un of otro motibo nan no por keda cas. Por ta nan ta na hospital, nan tin cu bay cas pasobra no tin un tratamento mas. E ora ey por ta e oncologo ta bisa pa bay disfruta e ultimo dianan. Pero di un of otro motibo nan no por bay cas.
Por ta e yiunan ta den exterior of tambe nan no tin suficiente famia na Aruba pa por cuida nan. Of e famia ta hay’e hopi duro, cual tambe por.
Hospice Atardi ta un opcion pa e huespednan aki bin cerca nan. Esey t’e concepto di hospice cu ta hopi importante pa sa. E enfasis cu nan tin ta riba e calidad di bida cu t’ey. Nan no ta pone hopi enfasis riba e hecho cu hende ta muri, pasobra nan no sa ki dia of ki ora. Na momento cu e pashent ta na hospice, ta pone hopi enfasis riba e calidad di bida cu tin.
Un huesped ta dicidi riba su mes. Tin huesped ta lanta hopi trempan, nan ta custuma pa bay y sinta pafo y disfruta un tiki di naturalesa.
Tin huesped cu gusta keda nan so den nan camber. Tin huesped cu ta gusta combersa cu e boluntarionan di e hospice, of come hunto. E ta diferente pa cada un. Cada huesped ta unico segun van Oers. Tur cos ta depende kico e huesped kier.
Esaki sigur ta un sistema nobo, pero tambe uno emocional. Segun van Oers, e ta un parti di bida. Ora cu ta yega n’e momento, ta den un situacion vulnerabel. Esey ta loke ta realisa y ta duna e huespednan espacio pa pasa door di e proceso. Ta un di e metanan cu tin eynan, p’e huespednan ta nan mes n’e hospice. Esey ta hopi importante pa nan, van Oers a bisa por ultimo.
