Diasabra atardi a tuma lugar e apertura oficial di “Hospice Atardi” situa na Noord Cura Cabay 147. Cuatro aña pasa, Dr. Peter Paul Hermans, Presidente di Fundacion Atardi, a conta durante e bunita ceremonia di develo y cortamento di cinta, cu e soño aki a wordo alimenta door di su amigo Henk van Breukelen (q.e.p.d).
Tabata un esfuerzo hopi grandi pa haci e Hospice un realidad. Y basa den e creencia den e cuido amoroso di e personanan cu ta den nan fase final di bida y por lo tanto den e fase mas dificil di nan bida, a yuda mantene e idea di e proyecto aki vigente, Dr. Hermans a expresa.
Paul Peter Hermans semper tin e poema di señora Benita Britt-Croes den mente cu ta bisa: “den e atardi di bo bida, ora solo ta baha bo no ta bo so, nos tey pa bo cu amor y respet”. E poema aki tabata un otro inspiracion pa haci e proyecto aki un realidad.
“E idea di e poema aki nos a difundi na nos conocirnan y amigonan cu na nan turno a comparti esaki na nan conocidonan y amigonan. Asina ey nos a cuminsa haya mas amigo y mas boluntario cu a cuminsa yuda nos di tur banda”, e presidente di Fundacion Atardi a duna di conoce. E realizacion di Hospice Atardi ta danki tambe na FCCA cu a mustra confianza den e Proyecto aki. AZV tambe a duna su aporte na e Proyecto aki mirando e intencion di esaki. Den e fase final Cruz Cora a yega y duna e empuhe final pa asina e proyecto a keda completa. Tin hopi mas persona y instancia cu a yuda haci e proyecto un realidad, pero menciona tur ta imposibel. “Un danki special ta bay na e sponsornan grandi manera Cruz Cora, CEDE Aruba, Samen Werkende Fondsen di e parti di Caribe Hulandes di Reino, AMC-Unicon, CMB, Rotary y Kiwanis, entre otro.
“Hospice Atardi” ta draai danki na e contribucion valioso di e personal boluntario cu ta haci e Hospice un realidad. Personal boluntario ta dedica nan tempo na e amor pa e prohimo. Un trabou cu ta wordo haci pa laga un otro persona sinti nan mes feliz y contento.
Y pesey e danki mas grandi ta bay pa e personal boluntario, “boso, e boluntarionan, nos ta gradici boso mas cu tur”. Boluntarionan manera Alice, Analoe, Anneke, Dinneke, Matsi, Wim, Rianne y Ana”. Dr. Hermans a termina bisando cu “e trabou boluntario bo ta haci cu bo curazon y no cu bo boca”. Director Medico di AZV, Dr. Joost Samuel a expresa durante su discurso cu e idea di e Hospice a nace durante un curso di cuido paliativo cu e dokternan di cas a haya. Den e preparacion pa e curso e idea di e Hospice a cuminsa haya un forma unda posteriormente Dr. Hermans y Benita a sigui desaroya e idea aki. AZV for di inicio tabata envolvi den e proyecto di Hospice y nan lo sigi apoya e hospice debi cu e necesidad pa e cuido paliativo ta grandi, Dr. Samuels a indica.
