Diasabra, di 15 di februari, Frasa Trading a organisa un Feria di fruta y berdura fresco, caminda cu comerciante y consumidornan en general por a probecha di cumpra esakinan na un bon prijs y hopi a sali cu cahanan di fruta y berdura cu un smile riba nan cara.
Feria a haci cu henter Aruba tin acceso na e comestiblenan aki fresco na un solo punto di benta. Ta trata di berdura y frutanan di calidad halto cu a caba di yega Aruba.
Frasa a haya e siman aki un container di fruta y berdura y mesora a dicidi pa organisa un Frasa Market. Manera por corda, Frasa a dicidi cu 40 aña pasa nan a cuminsa cu fruta y berdura, y kier duna e servicio aki bek y bay na nan “roots”. A dicidi di haci un feria, esta un mercado, unda e consumidor mes por cumpra fruta y berdura na un miho prijs di loke cu tin aworaki.
Na e market tabata tin cuminda, musica, ijscream y hopi cos dibertido pa mucha y adulto.
Frutanan cu bo ta haya na prijs hopi halto awo riba mercado, den e feria aki e tabata na prijsnan atractivo. Tabata tin frutanan manera melon, mango, bacoba, pero tambe berduranan manera promenton, tomati y hopi mas variacion y na bon prijs. E idea ta pa cada 2 siman of cada luna pa haci esaki y duna opcion di tin e feria. Riba e ilustracionnan por mira e personanan cu a sa di probecha di e Feria di Frasa Trading.
