Awe merdia pa mas o menos 1:30pm a sosode un accidente cu hopi daño material riba riba L.G. Smith Blvd. banda di e edificio unda antes tabata DOW. Un pickup lastrando un “forklift” riba trailer a kentel y e trailer a los for di e truck. Consecuentemente e trailer a bay dal den un auto marca KIA modelo Rio di Universidad di Aruba.
Tanto e chauffeur como tambe e pasahero den e KIA Rio a spanta dor di e impacto. E trailer a dal den e banda di pasahero di e auto. E ocupantenan a haya sla di e airbag, cu a activa y a dal nan den nan cara.
Ambulance a presenta na e sitio y a brinda asistencia eynan mes. Mas bien tabatin poco rasca y mas cu tur cos spanto dor di e impacto. Polis a cera caminda pa trafico pa por a conduci un investigacion pa sa exactamente con e desgracia a sosode. E vehiculo a sufri hopi daño mes.
