Diasabra mainta yamadanan a drenta cu tin un homber ta bati un dama den auto. A menciona cu ta un Nissan March color geel. E caso a sosode den parkiglot di Citgo Boulevard.
Polis tabata cerca y a yega mesora. Ora a bay atende cu e caso, a resulta cu ta e conoci di nan tabata den problema cu su pareha atrobe. Polis mes a menciona na e sitio cu mas cu un biaha ta bay duna asistencia pasobra e dama ta haya sla na man di e homber.
E mes a yega di yama polis pa e homber fam M. Tur e agresion di diasabra mainta a sosode den presencia di e yiu menor. Mas biaha e criatura inocente ta testigo di e agresion contra su mama. Danki Dios e cos a pasa den un area publico y cu hendenan a mira kico a sosode. A bati alarma na polis y hopi liher e agentenan a yega pa asina atende cu e yamada di agresion. Aunke e dama ta haya hopi golpi y haya un trato malo na man di e homber, tog e tey keto bay.
Kizas e sa pakico e ta acepta un bida asina cu ta mas bien un situacion unda ta rebaha e balor di un ser femenino. Te ainda sea riba su mesun yamada of riba yamada di testigonan, el a scapa y ta na bida. Kizas cu e golpinan cu e ta haya ta yega un momento cu e no ta logra yama of hende no ta mira y e consecuencia por ta otro. Polis lo sigui atende cu e yamadanan si e situacion aki sigui ripiti.
