Crisis Team a manda protocol pa enseñansa cu ta adapta. Aki nan ta informa riba cambio di maneho pa loke ta trata isolacion y cuarentena pa pasadia, centro di cuido di mucha y institucion educativo. A bin cu e cambio di maneho despues di un comunicado di prensa di crisis team fecha 30 di december 2021. Pero aworaki e cantidad di casonan di contagio activo ta yegando cinco mil.
Den e parti di isolacion, nan ta informa cu na momento un mucha haya resultado positivo di SARS-CoV-2, e mayor of voogd tin di pone e mucha den isolacion pa cinco dia. Tambe mester purba evita cu e mucha tin contacto directo cu demas den cas. Ta recorda cu e dianan di isolacion ta cuminsa na momento cu haya e resultado.
Un otro punto ta cu e mayor of voogd mester avisa scol of centro di cuido di mucha cu e mucha a bay den isolacion. Tambe mester manda nan e prueba di resultado positivo.
CUARENTENA OBLIGATORIO
Tur cu ta biba den e cas c’un persona cu a test positivo mester bay den cuarentena obligatorio pa cinco dia cuminsando fo’i e ultimo dia di contacto cu e mucha positivo. Den cas mester haci uzo di tapaboca na tur momento. Mayor of voogd tin e responsabilidad di informa tur den cas cu e mucha ta contagia cu Covid-19.
PROCEDURA
No solamente e mayor of voogd tin obligacion di avisa scol, pasadia of centro di mucha, pero scol, pasadia of centro di mucha tambe tin su obligacion. Nan mester avisa otro mayor cu tin alumno positivo sea den klas of grupo.
Tambe tin diferente punto cu scol, pasadia of centro di mucha mester tene na cuenta entre otro, c’un alumno of personal malo no ta permiti pa presenta. Seccion Cuido Salud Hubenil di Departamento di Salud Publico no ta tuma contacto cu mayor, voogd of scol tocante cuarentena obligatorio.
Crisis Team ta conseha tur docente y trahado pedagogico pa haci uzo di tapaboca durante orario di trabou.
Loading…
Reload document 
Open in new tab 
