Pasco atardi polisnan a bay pura direccion di Calabasstraat. Hendenan a yama pa un pelea. Ora polis a yega a haya algun hoben sinta pega cu cura di YMCA. Nan a lanta move mesora for di e sitio. A topa un famia ta disfrutando nan pasco. Nan tabata sinta bou afdak dilanti cas ta bebe un biña. Polis a puntra kico a pasa. Nan a splica polis cu algun homber den un auto chikito shinishi of blanco a yega den e caya dilanti nan cas. Un di e hombernan tabata lomba sunu. Nan a pasa parce pa cuminda un of otro conocir cu tabata sinta den Calabasstraat pega cu cura di YMCA. Dado momento e señora sinta bou afdak no a aprecia cu pasco hende ta yega dilanti su cas lomba sunu. El a bisa e persona cu sikiera e por bisti un shirt. E homber no a aprecia cu e señora a bise esey. A start un expresion cu insulto y menasa. Na final e homber a bisa cu e lo bolbe pa tira y basha bala. Djey prome cu polis a yega algun hende a mira un KIA Picanto blanco sali bay cu velocidad hopi halto for di e cas. Polis a puntra e señora si e kier cana e proceso di entrega keho. El a bisa polis cu e no ta interesa. Despues di tuma tur dato, polis a bandona e sitio. A keda di dal un buelta den Tarabana pa mira si por topa cu e auto cu e homber a expresa su mes den un forma menasante.
