Pa hobennan entre 16 y 25 aña, cu no a logra caba nan scol, por sigui un leerwerktraject. Segun Shinouska Albertus, coordinadora di e trayecto aki, ta ofrece e hobennan aki cuater diferente estudio cu nan por scoge di dje.
Tin basiskennis automonteur, basiskennis onderhoudsmonteur, cual ta mas direccion di mantencion. Tambe nan tin basis kennis commercieel medewerker, cual ta mas den direccion administrativo y tambe tin basis kennis uiterlijke verzorging, cual ta mas den direccion di beyesa.
Con e ta hinca den otro
E hobennan ta bay scol dos dia den siman. Esey ta tuma luga parti atardi, for di 3’or pa 6’or y 15. Esey ta bay tuma luga na EPB Hato. Tambe pa prome biaha ta bay start p’ariba di brug, cual lo tuma luga na EPB San Nicolas.
E otro tres dianan den siman, e hobennan ta bay core stage na un compania apunta. Tin cu remarca cu den pasado tabata tin hobennan cu a core stage caba y esey a bay hopi bon, cu na final di e aña escolar, nan a keda cu un trabao na e mesun compania unda cu a core stage.
Albertus ta gradici e companianan aki cu a yuda y a kere den e hobennan, cu a habri porta pa nan y despues a duna nan un trabao den nan compania.
E otro parti tambe cu tin ta e hobennan ta haya guia den grupo durante oranan di scol. Tambe nan ta haya guia individual. Den e forma aki ta purba di trece un cambio positivo den e circunstancianan di e hoben.
Voortraject
Prome cu cuminsa mes cu e aña escolar tin manera un voortraject. Durante e voortraject, e hobennan ta bin scol, hayando varios tayer y tambe diferente charla di motivacion, unda cu ta ekipa y sostene e hobennan, pa nan haci nan prome paso den un direccion pa un miho futuro.
Deadline pa inscribi ta dia 16 di augustus. E voortraject mes ta cuminsa dia 19 di augustus. Pa inscribi, loke e hobennan tin cu haci ta trece un papel di censo di 5 florin, nan mester trece nan ultimo rapport y tambe mester trece un prueba di banco pa e contribucion di e aña escolar, cual ta 125 florin.
Con largo
E trayecto aki tin un duracion di un aña. Dentro di un aña escolar, e hobennan por caba. E aña ta parti den dos semester y na final di cada semester, e hobennan ta haya nan certificado, caminda cu e hobennan por drenta mercado laboral of por sigui scol anochi.
Pa mas informacion y inscripcion
Pa contribucion por deposita riba cuenta di banco 44.67.892 na RBC. Inscripcion na Oranjestad ta dialuna y diaranson di 10’or di mainta pa 3’or di atardi, na e oficina di Openbare Avondleergangen Aruba (OAA) cu ta situa riba tereno di EPB Oranjestad.
Inscripcion pa San Nicolas ta diamars y diahuebs, di 10’or di mainta pa 3’or di atardi na oficina blauw di gobierno San Nicolas, cu ta situa net banda di YMCS San Nicolas, pega cu e rotonde.
Pa mas informacion por yama na telefon 5827324 of tambe na 7444324. Tambe por bishita nan pagina di Facebook “Leer Werk Traject Aruba”.
