Yüni akí e hóben mas votá den historia elektoral di Kòrsou, Gwendell Mercelina Jr. a kumpli su di dos aniversario for di su entrada polítiko, i un aña komo polítiko independiente den e senario nashonal.
Un époka kaminda ku tur dia di nobo, e ta analisando e situashon aktual i ta purba keda skèrpi i alabes tambe miéntras tantu e kumpli ku e yamada pa sirbi e bienestar komun e ta pidi pa mantené skèrpi tambe.
miéntras tantu nos a konosé un gobernashon práktikamente stabil pa un aña kaba kual ta bon pa desaroyo di nos komunidat, nos no a mira si niun kambio diferente den proseder di hasi polítika riba nos pais.
Ta remarkabel si e or’ei ku nos mester kuestioná nos mes komo votadónan, ku si ketubai den nos sistema demokrátiko nos keda skohe i disidí pa polítikonan ku ta skohe pa orkesta divishon o distinguí kiko ta bon òf no pa un pais miéntras a primintí diferente.
Polítikonan kosmétiko ku ta papia hopi pero e balansa di akshonnan ta kasi nulo, basta ku tin media pa kubri kosnan di nan kumbiniensia spesífiko. Polítikonan ku simplemente biba den un ‘ignoransia’ riba puntonan kritiko i keda bisa ku kos ta bon miéntras tin un pueblo sangrando ainda den diferente área.
Miéntras tantu nepotismo ta reina kaminda famianan ta ser privilegiá i yuda korumpí un sistema ku no a kaba di hecha. Un dicho famoso ta bisa “una sociedad patas arriba que prefiere la fiesta” p’esei ta preferá tene nos hendenan ignorante. Hendenan ta mas prekupá ora nan kanselá un fiesta o festival di ponton, mas prekupá ku ken pèrdè mundial, ku pa formashon di nos studiantenan, nos edukashon, ku pa nos propio nashon mes (patriotismo). P’esei nos no por keha ku mayan si korupshon ta asotá nos, paso nos prioridatnan ta ‘scheef’.
E sabio Einstein a bisa: nos no por solushoná nos problemanan ku e mesun pensamentu ku nos a krea nan. Awe nos ta para na un pais ku Gwendell a realisá falta transparensia i liderazgo, sigur si nos nota echo kon ta trata tópikonan manera: FEFFIK, Vèlt di Barber, Insel Air, MDPT, Refineria, GZE, UTS, Algemene Rekenkamer, Enseñansa Liber, Enseñansa den Region, Independensia Konseho Supremo Elektoral, CFT, Doggy Beach, pa menshoná algun.
Alabes e mesun gobernashon a demostrá di por atendé entre otro ku e problemátika di HNO (Hospital Nobo) den un forma kla, pero ainda falta pa un parlamento bibu pa manda pidi un enkuesta parlamentario pa klarifiká e echonan di kada depchi di e pueblo.
Di otro forma bo nota kon e gobièrnu ta tratando e studiantenan di FEFFIK, i e instituto en general, kon a trata e ‘Raad van Commissaris’ despues di posponé e desishon wardando riba un Diálogo Nashonal ainda nan si ta sigui orkesta pa imponé miéntras a palabra algu konkreto. Ta lamentabel ku es tópiko ei so ta ilustrá kon nos ta trata tur otro kos den nos pais, i nos komo nashon tambe asimilando manera ta suidadano kèns tin.
Ta remarkabel pa informá ku ta e mesun gobernashon kaminda e nashon a depositá su konfiansa riba un akuerdo ku a primintídi por krea speransa i pone e pais move bai dilanti den bon direkshon atrobe. Un gobernashon ku ta pone atenshon real riba enseñansa, edukashon i formashon di pueblo i alabes atendé e pobresa i divishon ku ta reina. Unu ku lo prekupá ku tur e kosnan ku ta na e pueblo su kurason i ku lo traha pa un komunidat balansá.
Speransa te último kos ku nos mester pèrdè, i miéntras tantu Mercelina ta keda kere ku e por yuda tene e komunidat skerpi, trahando den un forma revolushonario, aworakí kasi bo por bisa e ta e promé polítiko rasta maskulino den historia tambe. miéntras tantu ku e ta independiente, hustu i kritiko e lo keda traha riba renobashon polítiko i yuda klarifiká kaminda por pa e generashon ku ta sigui. Lo e sigui apoyá e inisiativanan bon ehekutá, i lo kontra arestá tur inisiativa eróneo pa komunidat. Den partikular e lo lucha pa defensa i derechi di nos hóbennan, grandinan, i e gruponan afektá den minoria sin niun paso atras
E yamada ta bai pa nos uni enfoká riba un pais mas ekitativo, yuda desaroyá un merkado laboral ku ta generá empleo pa nos hendenan su produktividat ku kompetensia empresarial sano. Kere den un pais inovativo, pasífiko, kaminda ku nos por tin libertat di krítika i aktua kontra loke ta robes i apoyá tur loke ku ta bon.
Kaminda ta traha pa union i libra for di e polarisashon dañino ku e último elekshonnan a laga pa nos.
Gwendell ta terminá ku e siguiente mensahe: “Mi ta keda kere den un mihó pais, unu felis ku mihó oportunidat pa tur hende. Nos no por keda ketu mas i laga situashonnan pasa riba un nashon ku tantu potensial, p’esei mester enfrentá nos realidat keda empoderá otro pa nos por siña for di nos erornan i krese. Ban ta mas transparente, papia habri pa asina nos por konfrontá kualke reto huntu. E trabou nunka lo tèrminá, pero nos por marka un diferensia, kaminda ta huntu nos ta konstruí e nashon aki, p’esei nos mester keda tene otro skèrpi!”
