Tabata riba 30 di september 2021 cu Heintje Ras a anuncia cu e lo cuminsa cu un hazaña. Den e hazaña aki, Ras a permanece den un mina di fosfaat bao tera, den scuridad, pa 100 dia largo. Meta di e hazaña aki tabata pa recauda fondo pa por regala Aruba un museo mas grandi. Despues di su anuncio, dia 2 di october 2021 el a drenta e Mina di Fosfaat p’asina cuminsa cu su hazaña di 100 dia.
Heintje Ras tin un deseo, un soño, un pasion cu ta pa colecciona articulo, artefacto y obhetonan antiguo y historico, manera; disco, tocadisco, diferente hero di strica, telefon, camara, mashin di mula, mashin di cose y mas. Su cas a bira chikito pa tur e inventario cu e tin di coleccionnan bieu.
Meta di e hazaña
Meta di e Hazaña Mega Museo Aruba 2021 tabata no solamente pa recauda fondo pa yega na su edificio di Mega Museo Aruba, sino tambe pa halsa Aruba su nomber na laira. Esaki door di haci e hazaña aki tambe pa kibra y publica e record mundial den e buki ‘Guinness Book of World Records’.
