Diadomingo anochi alrededor di 9:15 pm a sosode un caso di joyriding na Wayaca. Un homber desconoci a subi un aut’i ambulance para dilanti nan post na Wayaca Falls y bay cu ne manera nada ta pasando. Pa su mala suerte, tabatin un paramedico sinta parti patras den e ambulance. El a confronta e homber mesora, un poco mas panort di Wayaca Supermarket, e homber a core baha y laga e ambulance para memey caminda.
Liberato Hoek, hefe di e departamento di ambulance di ImSan, a conta durante un entrevista cu 24ora.com cu, tin camara di siguridad tur caminda den e ambulance, pues ta haci e investigaticion mucho mas facil. Polis a tuma declaracion for di e paramediconan y a sigui cu nan patruya. Nan a controla den e area pero no a topa cu e homber.
Un ora despues, alrededor di 10:25 pm, polis di districto di Playa a topa cu e homber net dilanti di Fundacion Hende Muhe den Dificultad na Primavera. E homber ta cuadra cu descripcion y tabatin mas persona cu a confirma na polis cu esey t’e homber. Polis no a basila y a deten’e mesora, e homber tabata papia basta bruha.
El a bisa cu, polis a horta su cartera y su pertenencianan. A transport’e den un transporte policial pa ward’i polis caminda e tin di bay duna cuenta di su acto. E homber a bira malo, ambulance a presenta pa brind’e asistencia medico. Pues pa purba horta un ambulance, pa detencion y na final a bira malo ora cu polis tabata bahand’e for di e tranporte policial
