Despues di un presentacion na Almere, a toca turno na Amsterdam p’e presentacion itinerante di e buki artistico ‘Maternidad’ cu no ta solamente un buki cuatrilingual cu un oda na maternidad universal, sino tambe e aspiracion di e autornan Gustave Nouel y Zuleika Coffie pa crea un brug entre e partinan Europeo y Caribense di Reino Hulandes y entre nan y resto di mundo den e sentido artistico di e palabra.
Diadomingo, dia 26 di november for di 3:30 pm lo tuma lugar presentacion di e buki ‘Maternidad’ den KIT Café Amsterdam situa den Linnaeusstraat 2 (den edificio di Museo Mundial di Amsterdam, antiguo Instituto Real Tropical).
“Maternidad’ ta un buki cu pintura di Gustave Nouel y poesia cortico di Zuleika Coffie den e cuater idioma mas papia na Aruba (Papiamento, Hulandes, Ingles, Spaño).
Tambe lo mustra e pinturanan publica den e buki. Un buki cu tambe por ta instrumental pa yuda promove Papiamento. A invita Nuris Dabian, coordinado di Bienestar y Cultura pa Aruba na Hulanda, pa duna un discurso di apertura, representando Arubahuis/Aruba.
E siguiente presentacion ta planea pa luna di maart di otro aña na Den Haag y for di mei 2024 lo tin un presentacion na Biblioteca Nacional Aruba (BNA) y despues n’e otro parti di Reino Hulandes den Caribe cu a mustra interes.
Fuera di e presentacion di e buki, Zuleika Coffie y Gustave Nouel lo comparti nan experticio den forma di workshops.
