Parlamentario pa fraccion di MAS, Aquannette Gunn, a entrega un serie di pregunta na Minister di Enseñansa y Deporte Endy Croes relaciona cu Fundacion Lotto pa Deporte. E preguntanan aki ta relaciona na e expresionnan haci durante un evento 18 di juli ultimo, caminda e minister a indica cu e Hunta di Supervision di Fundacion Lotto pa Deporte a logra bolter e contract existente cu Canadian Bank Notes.
E mandatario a ratifica cu esaki lo ta algo beneficioso pa Aruba. Gunn a haci 5 pregunta na e Minister, den cual ta pidi e mandatario pa manda e supuesto contract cu a keda acorda entre Fundacion Lotto pa Deporte y Canadian Bank Note pa Parlamento. Tambe a pidi e Minister pa informa Parlamento kico concreto e renegociacion aki ta encera na beneficio di pais Aruba en general y na e deportistanan Arubiano en particular. A puntra Minister Croes si e renegociacion aki tabatin costo pa pais Aruba y of cualkier multa, y si ta asina di cuanto placa ta papia.
Parlamentario Gunn a dirigi no menos cu seis pregunta na e mandatario relaciona cu e suspension di e director di Fundacion Lotto pa Deporte Ronald Tuitt. Ta desea pa sa e motibo cu e hunta di supervision a tuma dicho decision den luna di mei ultimo. “Mas cu cuater luna a transcuri y no tin un bista concreto di e decision di e Hunta di Supervision pa cu dicho suspension, mientrastanto e Hunta a apunta Dominico Figaroa temporalmente na cabes di dicho fundacion, encarga cu e maneho diario”.
Ta desea di sa for di Minister si e Hunta di Supervision a termina cu e investigacion contra Tuitt y si esaki tabatin suficiente base pa termina e contract, of si mester a yega na acuerdo monetario cu Tuitt pa termina e relacion laboral. E parlamentario pa fraccion di MAS a termina bisando di ta spera cu Minister Endy Croes lo por contesta e serie di pregunta cu a keda haci na su persona for di dia 24 di juni, esnan entrega dia 12 di augustus y esunnan di dia 16 di augustus, relaciona cu Fundacion Lotto pa Deporte.
