Recientemente 24ora.com a puntra Minister President Evelyn Wever-Croes riba e motivo pakico su colega, Xiomara Maduro no tabata presente na e reunion cu gobierno a sostene recientemente cu representante di supermercado Chines. E mandatario a splica cu e titular di Finanzas tabatin un agenda demasiado ocupa cu a strobe di asisti na e encuentro aki y cu no a toca e tema di impuesto na e reunion toch.
Segun splicacion cu Wever-Croes a duna, a papia di diferente otro reto cu e supermercadonan ta encontra y cu a pidi atencion di gobierno p’e. “Nos ta atendiendo esey tambe,” el a indica. Tambe a bisa cu e reunion a wordo yama na un cierto momento y di parti di gobierno mester tabatin por lo menos tres minister presente.
Wever-Croes: “Pa nos tur t’ey ta dificil. Mescos cu gremio siman pasa, ta dos minister so por tabat’ey paso e schedule ta yen. Un proximo reunion bo lo weita otro cara tal vez, pero ta bay pa e mesun topico.” E hefe di gobierno ta aprecia enormemente hopi esunnan cu por tabat’ey.
Adicionalmente a duna di conoce cu Minister Xiomara Maduro e siman prome tabata cu vakantie y e dia ey di e reunion tabata su prome dia bek na trabou y tabatin reunionnan cu e no por a move.
