Diaranson mainta, un grupo di ciudadano preocupa a reuni dilanti di Citgo Boulevard, pa asina trece nan punto di bista dilanti pa loke ta trata e aumento di costo di bida como tambe gasolin y ta pidi di biaha, pa pueblo lanta diahuebs y duna sosten.
E conocido Adri de Palm, kende ta un ciudadano preocupa, a comenta cu a yega momento cu gasolin a bira asina caro, cu el a bira impagabel si nan kier haci nan trabao.
Prijs di taxista tin cu subi, prijs di autobus ta bay subi. Asina cu mishi cu gasolin, a mishi cu delaster un cos riba Aruba, el a menciona.
Comestibel ta subi, paña ta subi, piesa di auto ta subi, tur cos ta subi y de Palm kier pa gobierno cuminsa compronde cu no por wanta e cos ki mas.
Na aña 2008, gobierno di MEP mes a retene di e cen riba gasolin y accijns, caminda cu pa 10 aña te cu 2018, no tin un gobierno cu a mishi cu e fondo aki.
MEP a yega na mando y a sinta y a pone bek. Fuera di nan a pone bek, nan a redobla BBO. Tambe cu tur e aumento cu ta bin cada dia, ta haya sorpresa di bida. A yega un momento cu mester pone un paro n’e cos aki. Pueblo no por mas, Adri de Palm a enfatisa.
Pierre Lacle ta un taxista y e tambe a trece su punto dilanti. Taxista cu ta core tur dia riba caminda, ta sinti esaki. Casi el a redobla pa e taxistanan. nan tarifa ta uno fiho. Awo loke ta pasando, nan ta bay hisa e gasolin mas sin duda. Pa december y januari mester ta prepara pasobra e ta bay bin mas halto cu nunca. Den e aña aki den 11 luna el a subi den un promedio di 70 cen. Tarifa di taxista a keda mesun cos, segun Lacle. Aworaki nan ta sintie y no por carg’e mas. E ora kico a bay cas cu ne, Lacle ta puntra. Vooral awo, no ta taxista so ta sintie, sino tambe e chauffeurnan di autobus. Nan ta keda sigui bay atras y por lo pronto no ta mira bahamento den prijs di gasolin, Lacle a comenta. Ta pidi tur hende cu ta colega taxista y chauffeur di autobus, pueblo en general, cu no por keda sigui absorbe e parti aki. Mas y mas hende ta drenta den gobierno, nificando cu mas placa gobierno tin cu saca. E ta rancando for di e cartera di e ciudadano. Mas hende nan pone, mas gasto nan tin y ta for di e cartera di e ciudadano nan ta ranca y esey no por mas. Mester stop e cos aki, Lacle a menciona. “Pueblo ban lanta. Ban pone un ta basta,” el a bisa.
Pa un cobertura mas amplio lesa e edicion di TREMPAN di mañan.
