Diabierna tabata un dia special p’e team di Caribbean Town, unda cu a celebra e groundbreaking di e proyecto, caminda cu a anuncia publicamente e inicio di construccion. Victor Acosta, gerente di Caribbean Town, a splica cu despues di casi 2 aña trahando duro riba dje, diabierna tabata e prome biga a bin dilanti y esun cu ta bay riba e edificio.
E proyecto ta un realidad, el a indica. Loke cu ta haciendo ta un yamada p’e hendenan cu no tin cas, e hendenan cu a aplica pa algun tereno na DIP, cu tin kisas algun dificultad pa cumpra, bin bishita Caribbean Town. E ta un realidad y e ta un proyecto innovativo. Nan tin prijs accesibel pa nos hendenan. Probecha di e oportunidad cu tin, te ora cu tin inventario den apartamento y villas.
RESPONS DI PUEBLO
E benta riba su mes a bay tremendamente, el a splica. Miles di hende literalmente a bin bishita Caribbean Town. Algun di nan a cumpra. Otro a sinta warda y kier mira construccion, con cos ta bay. Awo t’e momento, el a bolbe enfatisa.
Tin espacio pa un proyecto manera esaki, manera cu gobierno a anuncia recientemente.
COMPANIA DI BRAZIL
Gerente di benta di e compania Codeme di Brazil, Luis Filho, ta contribuyendo cu Caribbean Town. El a splica cu ta un honor grandi pa nan. E compania ta bin di Bello Horizonte na Brazil, participando den un evento asina importante na Aruba.
Nan a cuminsa cu diseño di ingenieria, ‘face of the project’, tambe. Despues a sigui cu e fabricacion y awo ta bay cuminsa hinca e structuranan den otro cu ta bin fo’i Brazil. Pa forma parti di un proyecto asina importante na Aruba, ta nifica hopi p’e compania.
Filho a splica tambe cu nan tin nan staf local caba na Aruba, p’asina cuminsa hinca e structuranan den otro. Ta algo cu ta nifica hopi pa nan y ta contento di ta riba e isla.
CALIDAD DI E PRODUCTO
Loke ta considera awendia como un tayer di fabricacion mas moderno y up-to-date den Latino America, ta algo cu nan ta enfoca hopi cual ta calidad di e producto. Tambe nan ta cumpli cu standard, procedura, ta optimalisa y na final di dia, tin un producto di calidad halto. Nan tin un rate di defecto hopi chikito di producto. Loke por nota den e proyecto cu tur e columnanan cu a yega Aruba, no tin defecto y ta cuadra cu e fundeshi. Manera indica caba, nan meta ta pa calidad y p’e satisfaccion di e cliente na fin di dia.
Confiabilidad ta algo hopi importante. Na final loke ta haci e compania ta haya mas proyecto tanto den exterior como na Brazil, no ta solamente prijs, pero tambe satisfaccion di e cliente. Y esey ta sosode ora cu tin confiansa cu e cliente. Loke ta nifica hopi pa nan, ta pa mantene e clientenan contento, p’asina nan haci mas proyecto cu e compania y pa na final nan nomber ta den bon standard tanto rib’e isla como den exterior.
E MOMENTO TA AWO
E momento ta awo, Acosta a enfatisa. Tur cos den bida tin un momento. P’e hendenan cu ta buscando y cu por ta tabatin algun tipo di incertidumbre riba locual ta un proyecto vertical, Acosta ta conseha pa bin, busca informacion, sinta cu e team, pasobra un proyecto manera Caribbean Town y e prijsnan cu ta ofreciendo, cu e posibilidad di financiamento cu ta ofreciendo, ta dificilmente lo bin bek. Tin un demanda grandisimo, el a splica.
