Diasabra ultimo oficialmente Grant Thornton Aruba a lansa su servicionan nobo riba tereno di sostenibilidad. Segun drs. ing. Edsel Lopez RA, Managing Partner di Grant Thornton Aruba. E idea pa bin cu e servicio nobo aki a wordo inspira door di e “Sustainable Development Goals” (SDG) di United Nations, na unda esaki nan a wordo adopta tambe door di Aruba. Grant Thornton Aruba ta haya cu esaki ta hopi importante pa comunidad di Aruba, pero tambe pa henter mundo.
Ta mira mas y mas cu e companianan ta hinca e parti di SDG den nan strategia. Y Grant Thornton Aruba tambe ta haya pa aporta na esaki y a inclui e SDG nan tambe como parti di nan strategia. Ta encurasha otro compania na Aruba cu no a hacie ainda, pa tambe considera pa hinca e metanan aki,cual ta sumamente importante p’e comunidad di Aruba como tambe pa henter mundo. Hunto, mirando tur esaki, por tin un Aruba y un mundo mas miho.
Grant Thornton Aruba ta sumamente orguyoso di su team, cu oficialmente a lansa nan servicio riba tereno di yuda e companianan con nan por yega of hinca e parti di SDG den nan strategia y con nan por purba realisa nan na Aruba.
Segun Senior Manager, Shelby Maduro, e servicionan di Grant Thornton Aruba lo inclui na momento di traha strategia como compania, con ta bay involucra esaki den strategia y meta. Despues, naturalmente ora nan ta den meta, lo mester bay implementa esaki den e organisacion y tambe sigur haya tur empleado cu nan tambe ta keda tras di esaki.
Un parti di cultura di compania ta bai hunga rol hopi importante pa asina zorg cu e metanan stipula lo wordo “embedded” den e organisacion.
Shelby ta sigui splica cu un otro aspecto cu lo enfoca riba dje, ta con ta bay raporta riba e progreso di e compania pa cu e SDGs aki y tambe p’asina aki demostra cu ta yegando n’e metanan stipula den strategia.
E servicionan di Grant Thornton Aruba ta inclui entre otro strategia, implementacion y sigur tambe e parti unda cu ta midi y raporta riba e progreso di sostenibilidad.
SDG Challenge colaboracion Grant Thornton Aruba y AAA
Den colaboracion cu “Wings of Hope” di AAA, Grant Thornton Aruba a duna informacion n’e maestronan cu a atende pa loke t’e SDG Challenge “Scol campeon 2022”. Segun Jourainne Wever, Senior Manager Tax, nan papel tabata pa splica riba SGD cu ta 17 en total cu mundo henter (193 pais, incluyendo Aruba) a compromete pa yuda nan reduci por ehempel pobresa, enfoca riba medio ambiente y toch crea un comunidad na paz y cu hopi progreso.
Papel di Grant Thornton Aruba e mainta aki tabata pa ilustra y informa tur hende riba e 17 metanan aki y con por implementa esaki na Aruba y tambe pa tene cuenta cu nan pa e challenge “Scol Campeon 2022”.
Den e programa special cu a tuma lugar diasabra, dia 26 di maart na ATIA cu tabata e SDG Challenge, unda cu e scolnan lo traha riba e metanan aki den un programa special enfoca riba nan scol, Jourainne Wever a bisa por ultimo.
