Minister Xiomara Ruiz-Maduro, encarga cu maneho di Finansa, Asuntonan Economico y Cultura a anuncia awe adaptacion di orario cu negoshinan por opera riba nos isla. Den pasado Minister Michelle Hooyboer-Winklaar a flexibilisa orario di negoshinan, haciendo cu, por ehempel supermercadonan, por keda habri te mas lat. Awe Gobierno a anuncia un maneho nobo mas flexibel ainda, den cual tiendanan por keda habri normal te cu 12:00am.
Di acuerdo cu e maneho nobo di e Minister di Asuntonan Economico, tur negoshi por habri awor for di 6:00am te cu 12:00am sin cu mester un permiso adicional di Gobierno pa haci esey. Claro cu esaki no ta un obligacion, tiendanan por sigui opera den nan orario normal, pero den caso cu kier keda habri te laat, esey awor ta posibel. Mester tene cuenta si cu leynan laboral no a cambia, pues trahadonan ta sigui traha 8 ora. Si opta pa bo negoshi habri mainta y cera te marduga, mester pensa den dos of mas warda.
Esaki ta pa evita cu un tienda ta pensa di habri mainta y sigui su operacion te anochi laat cu e mesun trahadonan. Di otro banda, habrimento di tiendanan te marduga ta pone un extra presion riba siguridad y mas patruyanan policial pa evita ladronicia y atraco. Pa e grupo di trahadonan di oficina, e opcion aki ta haci cu nan por haci nan compras na supermercado te mas lat. kisas hasta despues cu e muchanan bay drumi na cas.
Pa algun aña caba, shopping mallnan na Aruba ta habri te 9:00pm y otronan te 10:00pm, debi cu specialmente mainta y merdia nan no ta haya benta. Atardi pa anochi ta e ora cu mas nan ta logra benta. Pero, mientras cu tiendanan den area hotelero a cambia orario, esunnan den caya Betico Croes a sigui cera fielmente 6:00pm. Kisas cu e cambio aki, mara na organisa eventonan y mercadea e tiendanan, sin duda lo por traduci den mas benta y mas interaccion cu clientenan.
Pa e trahadonan den e tiendanan e ta nifica orarionan diferente cu lo mester adapta na dje. Di otro banda, demanda den mercado ta dinamico y ta cambia cu tempo y dependiendo circunstancia. Cu tanto competencia awendia di mesun tipondi negoshi, banda di opcionnan tecnologico pa bestel tur cos online, ta haci e presion di brinda mas y miho servicio mas grandi ainda. Y den esey e comodidad di por haci compras te mas lat, ta un oportunidad cu negoshinan lo no kier perde.
